ԵՐԵՎԱՆ, 3 հուլիսի — Sputnik. Օդերևութաբանները զգուշացնում են, որ հուլիսի 4-ին և 5-ին Հայաստանում սպասվում է բարձր ջերմային ֆոն, օդի ջերմաստիճանը նորմայից բարձր կլինի 5-6 աստիճանով: Հովտային գոտիներում` Երևանում, Արարատի, Արմավիրի, Վայոց ձորի մարզերում, ցերեկվա ժամերին ջերմաստիճանը կհասնի +40-ի։
Հայաստանի աշխատողներին եղանակային այս պայմաններում հատուկ արձակուրդ չի տրամադրվի, քանի որ ՀՀ աշխատանքային օրենսգիրքը նման բան չի նախատեսում։
Աշխատանքային օրենսգրքի 153-րդ հոդվածով եղանակային նման պայմանների դեպքերում նախատեսվում են հատուկ ընդմիջումներ։ Sputnik Արմենիայի հետ զրույցում ասաց ՀՀ Աշխատանքի և սոցիալական հարցերի նախարարության աշխատանքի վարձատրության բաժնի գլխավոր մասնագետ Արփինե Սարգսյանը։
«Հատուկ ընդմիջումներ պետք է տրամադրվեն, եթե աշխատանքը կատարվում է +40 աստիճանից բարձր կամ —10 աստիճանից ցածր օդի ջերմաստիճանային պայմաններում»,- ասված է օրենքի հիշյալ դրույթում։
Սարգսյանն ընդգծում է, որ տվյալ ջերմաստիճանը պետք է լինի ոչ թե դրսում, այլ տվյալ պահին` աշխատավայրում։
«Ընդմիջումների տևողությունն ու պարբերականությունն օրենքով հստակ սահմանված չէ, դրանք սահմանվում են ներքին կարգապահական կանոններով կամ աշխատանքային պայմանագրով»,- ասաց Sputnik Արմենիայի զրուցակիցը։
Մեր հարցին, թե ինչ պիտի անի աշխատողը, եթե աշխատավայրում օդի ջերմաստիճանը գերազանցում է 40 աստիճանը կամ աշխատում է դրսում` արևի տակ, իսկ գործատուն չի տրամադրում օրենքով նախատեսված ընդմիջումները, Սարգսյանը պատասխանեց, որ այդ դեպքում աշխատողը կարող է դիմել դատական ատյաններ կամ աշխատողների շահերը ներկայացնող արհմիություններ։
