ԵՐԵՎԱՆ, 3 հուլիսի — Sputnik. Հունիսի 17-ին Գյումրու «Ավստրիական Մոր և մանկան հիվանդանոց» տեղափոխելու ճանապարհին նորածին է մահացել:
Ծննդկանը Արթիկի Մոր և մանկան առողջության ապահովման կենտրոնում հունիսի 16-ի երեկոյան վաղաժամ ծննդաբերել է արական սեռի երեխա: Մայրը երեխայի հետ մանկաբույժի ուղեկցությամբ տեղափոխվել է Գյումրի, սակայն նորածինը ճանապարհին մահացել է: Ծննդկանը եղել է 25-ամյա Անի Աբրահամյանը՝ Արթիկի տարածաշրջանի Մեղրաշեն գյուղից: Սա կնոջ առաջին ծննդաբերությունն էր:
«Նորածինը կշռել է 800 գրամ: Հղին խնդիր չի ունեցել։ Միակ խնդիրը եղել է այն, որ ժամանակից շուտ է ծննդաբերել՝ 14 շաբաթ շուտ: Նորածինը եղել է անկենսունակ. թոքերը չեն գործել»,- Sputnik Արմենիայի հետ ունեցած զրույցում ասաց Արթիկի ծննդատան տնօրեն Սիմոն Մանուկյանը։
Նա ավելացրեց, որ բժիշկը փորձառու է եղել ու իրենից կախված ամեն ինչ արել է նորածնի կյանքը փրկելու համար։
«Ցավոք, կան պտուղներ, որոնք անկենսունակ են ծնվում։ Պորտալարից անջատվելով` թոքը պետք է կարողանա ինքնուրույն աշխատել, բայց եթե չի աշխատում, ոչինչ հնարավոր չէ անել։ Նույնիսկ Գյումրի տեղափոխելն էր անօգուտ։ Բայց բժիշկը, «ձեռքը փրփուրներին գցելով», փորձել է նորածնի կյանքը փրկել»,- ասաց Մանուկյանը:
Դեպքի առթիվ Արթիկի քննչական բաժնում հարուցվել է քրեական գործ՝ ՀՀ քրեական օրենսգրքի 130-րդ հոդվածի երկրորդ մասի հատկանիշներով: Այն է՝ բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը՝ դրանց նկատմամբ անփույթ կամ անբարեխիղճ վերաբերմունքի հետևանքով, եթե այն անզգուշությամբ առաջացրել է բուժվող հիվանդի մահ: Նշանակվել են դատաբժշկական փորձաքննություններ՝ երեխայի մահվան պատճառը պարզելու համար:
