ԵՐԵՎԱՆ, 1 հուլիսի — Sputnik. Հայ վարորդները մոտ ապագայում կսկսեն օգտագործել տրանսպորտային միջոցների էլեկտրոնային անձնագրեր (ՏՄԱ), այսպես կոչված՝ «տեխանձնագրեր»։
Ռուսաստանը, Բելառուսն ու Ղազախստանը 2014 թվականի օգոստոսի 15-ին համաձայնագիր են ստորագրել տրանսպորտային միջոցների անձնագրերի միասնական ձևի, մեքենայի և տեխնիկայի այլ տեսակների անձնագրերի ներածման և էլեկտրոնային անձնագրերի համակարգերի կազմակերպման մասին։ Ավելի ուշ նշված համաձայնագրին միացել է Ղրղըզստանը։ Հայաստանի Հանրապետությունը համաձայնագրին միանալու գործընթացի մեջ է և մասնակցում է դրա իրագործմանը ուղղված բոլոր միջոցառումներին։
«Համաձայնագրին Հայաստանի միանալու գործընթացը շարունակվում է։ Նախագիծը կազմված է, մնում է հաստատել այն»,- Sputnik Արմենիային հայտնեցին ՀՀ տրանսպորտի և կապի նախարարությունում։
ՌԴ Դաշնային խորհուրդը հավանություն է տվել Համաձայնագրի վավերացմանը մայիսին։
«Տվյալ համաձայնագիրը կոչված է մուտքի հսկողության, անվտանգության և միասնական ազգային տրանսպորտային միջոցների տվյալների հավաստիության համակարգ ստեղծել, որը կապահովի Մաքսային միության տարածքում տեխնիկայի ազատ շրջանառությունը»,- ներկայացնելով օրինագիծը՝ հայտնեց ՌԴ արդյունաբերության և առևտրի փոխնախարար Ալեքսանդր Մորոզովը։
ՏՄԱ նոր ձևի գործածման մեկնարկը նախատեսված էր 2017 թվականի հուլիսի 1-ին։ Սակայն անցման գործընթացը, ԵԱՏՄ երկրների դիլերների խնդրանքով, մեկ տարով հետաձգեցին։ ՏՄԱ-ն հանձնվելու է առքի և վաճառքի գործարքների ժամանակ, քաղաքացիների ցանկությամբ։ Ենթադրվում է, որ գործող անձնագրերի ստիպողական փոխանակում չի լինելու։
Ավելի վաղ տրված թղթի ՏՄԱ-ները սեփականատիրոջ որոշմամբ կարող են կիրառվել անժամկետ, տրանսպորտային միջոցի գործարկման ամբողջ ընթացքում։
Նորամուծությունը տրանսպորտային միջոցի գրանցման գործընթացի շրջանակում ավելորդ փաստաթղթեր չի պահանջի։
2016 թվականի հոկտեմբերի 1-ից թեստավորում է սկսվել, իսկ հետագայում՝ էլեկտրոնային ՏՄԱ-ների ավտոմատացված համակարգի փորձարկումներ։ Համաձայնագրի իրականացումն ու էլեկրտոնային անձնագրերի շրջանառությունը ինտեգրացիոն նախագիծ է՝ ուղղված ԵԱՏՄ երկրների տարածքում տրանսպորտային միջոցների ազատ շրջանառության ապահովման համար պայմաններ ստեղծելուն։
