ԵՐԵՎԱՆ, 30 հունիսի — Sputnik. Մի շարք երկրների գիտնականները եզրակացրել են, որ Հայաստանի ու Լեռնային Ղարաբաղի բնակչության իգական սեռը վերջին 8000 տարում գենետիկական տեսանկյունից գրեթե չի փոխվել։ Այդ մասին գրում է Cell Press պարբերականը` հղում անելով Current Biology ամսագրում հրապարակված հետազոտությանը։
Մասնագետները խոստովանել են, որ չեն կարողացել որևէ փոփոխություն հայտնաբերել կանանց գենոֆոնդում շատ տևական ժամանակահատվածում։
«Դա շատ հետաքրքիր է, քանի որ այդ ժամանակահատվածում տարածաշրջանը վերապրել է բազմաթիվ մշակութային տեղաշարժեր, սակայն այդ փոփոխությունները հավանաբար կապված չեն գենետիկական ազդեցության հետ, առնվազն բնակչության իգական հատվածի դեպքում», – կարծում են ուսումնասիրության համահեղինակներ Աշոտ Մարգարյանն ու Մորտեն Ալենտոֆտը։
Փորձագետները նման եզրակացությունների են եկել՝ վերլուծելով Հայաստանի և ԼՂ-ի 52 հնագույն կմախքների մետոխոնդրիալ գենոմները։ Ամենահին նմուշները եղել են 7800 տարեկան։
Այդ տվյալները գիտնականները համեմատել են ժամանակակիցների մետոխոնդրիալ գենոմների հետ։ Վերլուծությունը ցույց է տվել, որ ժամանակակից Հայաստանի և ԼՂ-ի տարածքի բնակչության թվաքանակն արագ աճել է սառցե շրջանից հետո (մոտ 18 հազար տարի առաջ), սակայն տարածաշրջանում միգրացիան, որը տեղի է ունեցել մոտ 2-3 ազար տարի առաջ, գրեթե չի անդրադարձել կանանց վրա։
Հետագայում գիտնականները մտադիր են անցկացնել նմուշների գենետիկական վերլուծություն, որոնք վերցվել են Ադրբեջանի արևելյան տարածքներից, ինչպես նաև Վրաստանից։
