ԵՐԵՎԱՆ, 30 հունիսի — Sputnik. Հուլիսին կանխատեսվում է կլիմայական նորմայից 2-3 աստիճանով բարձր օդի միջին ջերմաստիճան, որի պատճառը լինելու է Արաբական թերակղզուց Կովկաս արևադարձային տաք հոսանքների հերթական ներթափանցումը: Այս մասին այսօր՝ հունիսի 30-ին, լրագրողների հետ հանդիպման ժամանակ ասաց ՀՀ ԱԻՆ «Հիդրոմետ» ծառայության օդերևութաբանության կենտրոնի պետ Գագիկ Սուրենյանը:
«Վաղվանից սկսած`մինչև հուլիսի 6-ը և 7-ը ներառյալ, ՀՀ ողջ տարածքում բացառապես սպասվում է առանց տեղումների եղանակ, իսկ օդի ջերմաստիճանը աստիճանաբար կսկսի բարձրանալ: Եթե այսօր Երևանում կանխատեսվում է մինչև +35 աստիճան, վաղը Արարատյան դաշտում, Երևանում, Սյունիքի և Տավուշի հովիտներում օդի ջերմաստիճանը կհասնի +36°-ի, հուլիսի 2-ին՝ +37°-ի, հուլիսի 3-ին՝ +38°-ի, հուլիսի 4-5-ին ջերմային ալիքը կհասնի պիկին՝ +39+40°, իսկ Արարատյան դաշտի, Երևանի առանձին ցածրադիր հատվածնեորւմ չի բացառվում մինչև +41° տաքություն: Այդ օրերին օդի ջերմաստիճանը կլիմայական նորմայից բարձր կլինի 7-9 աստիճանով»,- ասաց Սուրենյանը
Նա նշեց նաև, որ այսպիսի բարձր ջերմային ֆոնը ստեղծելու է բարձր կարգի հրդեհավտանգ իրավիճակ, ուստի պահանջվում է հատկապես անտառային խոտածածկ վայրերում հրդեհներց խուսափելու համար հնարավորինս զգույշ լինել:
Օդերևութաբանի խոսքով` հուլիսին և օգոստոսին ջերմային ալիքները պարբերաբար կրկնվելու են, բայց ազգաբնակչության մոտ թող այնպիսի կարծիք չստեղծվի, թե 60 օր անընդմեջ +39-ից +41 աստիճան է լինելու:
«Կունենանք նաև ցուրտ ներխուժումներ, ջերմաստիճանի անկում, տեղումներ, քամու ուժգնացում»,- ասաց նա։
Սուրենյանի խոսքով` կլինեն օրեր, երբ Երևանում ջերմաստիճանը կլինի, օրինակ, մինչև +30+31 աստիճան:
