ԵՐԵՎԱՆ, 30 հունիսի – Sputnik. Այն փաստը, որ Booking.com համակարգը հրաժարվել է աշխատել Արցախի հետ, էապես չի ազդի զբոսաշրջության փաթեթի վրա, կարծում են Ստեփանակերտում։
«Չեմ կարծում, որ դա էապես կազդի Արցախ եկող զբոսաշրջիկների քանակի վրա։ Ժամանակը ցույց կտա, բայց դա հերթական վատությունն է, որը մեր հնարավոր զբոսաշրջիկների համար անհարմարություններ է ստեղծում։ Կան հարյուրավոր այլ ճանապարհներ` մեր հյուրանոցներում տեղեր ամրագրելու համար առանց այդ ծառայության»,– ասաց Արցախի նախագահի մամուլի քարտուղար Դավիթ Բաբայանը։
Նրա խոսքով` Բաքվի գործողությունները վկայում են նախանձի մասին, որը Ադրբեջանը չի կարողանում թաքցնել։
«Դա նախանձ է, զայրույթ և անզորություն այն բանից, որ Արցախը զբոսաշրջիկների համար ավելի գրավիչ է դառնում»,– նշեց Բաբայանը` հավելելով, որ այդ ամենն Ադրբեջանը փորձում է նման բողոքներով հատուցել։
Բաբայանը կարծում է, որ այդ բողոքներն անպատասխան կմնան։ Այդուամենայնիվ, Արցախն աշխատում է ապագայում նման քայլերի կանխման ուղղությամբ։
Booking.com հյուրանոցների օնլայն ամրագրման համակարգը դադարեցրել է աշխատանքը Արցախում Ադրբեջանի բողոքից հետո։ Հաղորդագրության մեջ ասված էր, եթե ամրագրման համակարգը շարունակի աշխատել` հատուկ միջոցներ կձեռնարկվեն։
