ԵՐԵՎԱՆ, 30 հունիսի — Sputnik. ՀՀ արտակարգ իրավիճակների նախարար Դավիթ Տոնոյանը երկարամյա անբասիր ծառայության և ծառայողական պարտականությունները բարեխղճորեն կատարելու համար ԱԻՆ փրկարար ծառայության «Անբասիր ծառայության համար 10 տարի» 3-րդ աստիճանի, «Անբասիր ծառայության համար 15 տարի» 2-րդ աստիճանի և «Անբասիր ծառայության համար 20 տարի» 1-ին աստիճանի մեդալներ է շնորհել համակարգի 42 աշխատակցի:
Նախարար Տոնոյանը նաև ավարտական վկայականներ է հանձնել ԱԻՆ Ճգնաժամային կառավարման պետական ակադեմիան գերազանց ավարտած 19 շրջանավարտի, հայտնում է ԱԻՆ-ի պաշտոնական կայքը:
«Այսօր զուգակցվում է երկու խորհրդանշական իրադարձություն՝ խրախուսվում են տարիների վաստակ ունեցող փրկարար ծառայողներն ու դիպլոմներ են հանձնվում նրանց փոխարինելու պատրաստ՝ արտակարգ իրավիճակների նախարարության ճգնաժամային կառավարման պետական ակադեմիայի շրջանավարտներին: Վաստակաշատ փրկարարները լավագույն օրինակն են, որոնց կարող է հետևել երիտասարդ սերունդը՝ ընտրելով ամենապահանջված մասնագիտություններից մեկը»,- ասել է Դավիթ Տոնոյանը:
Նախարարի խոսքով՝ զինվորական ծառայություն անցած երիտասարդների համար ստեղծվելու է հնարավորություն՝ կարճաժամկետ վերապատրաստումից հետո համալրելու երկրի սահմանների պաշտպանների՝ հայոց բանակի սպայակազմի շարքերը:
«Մեր ծառայությունն ու աշխատանքը չունի սկիզբ և ավարտ, մենք մշտապես պատրաստ ենք արձագանքելու ցանկացած ահազանգի: Արտակարգ իրավիճակներն ու ճգնաժամերը կառավարելի են, և մենք պետք է գիտակցենք, որ արագ ու արհեստավարժ արձագանքը չունի և երբեք չի կարող ունենալ այլընտրանք: Պատրաստ լինենք, անխուսափելի աղետների դեպքում անգամ, նվազագույնի հասցնելու կորուստները, իսկ տուժածներին՝ օր առաջ վերադարձնելու բնականոն կյանքի»,- ասել է նախարարը:
Կայացել է նաև ԱԻՆ ճգնաժամային կառավարման պետական ակադեմիայի շրջանավարտների ավարտական վկայականների հանձնման արարողությունը: Ակադեմիայի 174 շրջանավարտ հանդիսավոր երդվել է անձնվիրաբար ծառայել Հայաստանի Հանրապետությանը:
