ԵՐԵՎԱՆ, 30 հունիսի – Sputnik. «Եռամիասնություն հանուն զարգացման» հասարակական կազմակերպությունը ամփոփել է վերջին վեց ամսվա քայլերն և ներկայացրել է առաջիկա անելիքները։
Երեխաներն, ընտանիքներն ու երիտասարդները շարունակում են մնալ բարեգործական կազմակերպության ուշադրության կենտրոնում, նշեց «Եռամիասնություն հանուն զարգացման» ՀԿ նախագահ Մամիկոն Խուրշուդյանը։
«Վերջին վեց ամսվա ընթացքում մեզ հաջողվել է մի քանի ընտանիքի օգնել, կազմակերպել մոտ 1000 երեխայի հանգիստը, ապահովել նրանց սննդով և հագուստով։ Ուժերի չափով օգնություն է ցուցաբերվել արցախյան շարժման և ապրիլյան պատերազմի ժամանակ զոհվածների ընտանիքներին»,– ասաց Խուրշուդյանը։
Կազմակերպությունը նաև մասնակցել է ապրիլյան պատերազմի հերոսների անվամբ կոչված դպրոցների բացմանը։
Միաժամանակ, կազմակերպությունը մեծ ուշադրություն է դարձնում երիտասարդների համար հնարավորություններ ստեղծելուն։ Մի շարք մշակութային միջոցառումներ են իրականացվել, մասնավորապես` Step by step մրցույթը, որը թույլ է տվել լավագույն 13 երիտասարդի՝ մասնակցել միջազգային մրցույթների և անվճար ձայնագրել իրենց երգերը տարբեր ստուդիաներում։
Բացի վերոհիշյալ նախաձեռնություններից, «Եռամիասնություն հանուն զարգացման» ՀԿ-ն կազմակերպել է մոտ 20 միջոցառում, որպեսզի երիտասարդներն իրենց դրսևորեն մշակութային ոլորտում ։
Կազմակերպությունը նաև սատարել է երիտասարդ լուսանկարիչներին, անցկացվել են ցուցահանդեսներ, որոնց ժամանակ հավաքված միջոցներն ուղղվել են բարեգործությանը։
Կազմակերպության աշխատանքի ևս մի ոլորտն է մարզերի ընտանիքներին օգնություն ցուցաբերելը, մասնավորապես` սահմանամերձ գյուղերում, որտեղ շատերը ծանր սոցիալական պայմաններում են ապրում։ Կազմակերպության ներկայացուցիչները նաև երեխաների պաշտպանության օրն են նշել Ղազարավան գյուղում, որտեղ մոտ 500 երեխա կա, և հինգ մոտակա գյուղերը նվերներ են ստացել։
Առաջիկա ուսումնական տարվա առթիվ հասարակական կազմակերպությունը նախատեսում է երեխաներին գրենական պիտույքի մոտ 1000 հավաքածու բաժանել։
Խուրշուդյանի խոսքով` հիմնական բարերարները, որոնց հետ նրանք համագործակցու են, Հայաստանում են գտնվում, մի քանի ընտանիք կա Սփյուռքում։ Նրանք ոչ թե գումարային օգնություն են ընդունում, այլ իրեր և սնունդ, որը փոխանցում են կարիքավորներին։ Եթե նրանց թիվը գերազանցում է անհրաժեշտ քանակը, դրանք փոխանցում են մանկատներ և ծերանոցներ։
«Եռամիասնություն հանուն զարգացման» ՀԿ–ի ակտիվ գործիչներից մեկը, որը նաև «Ընդդեմ իրավական կամայականության» հասարակական կազմակերպության իրավաբանն է՝ Նառա Արամյանն, իր հերթին, նշեց, որ ձգտում են հասարակական գործունեության մեջ ներգրավել բնակչության ավելի լայն շերտերի, տարբեր մասնագիտության և տարիքների մարդկանց։
«Կարիքավորների թիվը տարեցտարի աճում է, շատ բան է կախված ոչ միայն երկրի սոցիալական վիճակից, այլև կառուցվածքային փոփոխությունների անհրաժեշտությունից»,– ասաց Արամյանը։
Հասարակական կազմակերպությունը համագործակցում է Երևանի քաղաքապետարանի տեղական ինքնակառավարման մարմինների հետ։
«Եռամիասնությունը հանուն զարգացման» հասարակական կազմակերպությունը հիմնվել է 2009 թվականին։ Աշխատանքը սկսել է Արցախում, սակայն շուտով գործունեություն է իրականացրել նաև ՀՀ տարածքում։ Հիմա ՀԿ–ում մոտ 20 հոգի կա, որոնց, անհրաժեշտության դեպքում, ավելանում են կամավորները։
