ԵՐԵՎԱՆ, 29 հունիսի — Sputnik. Վիեննայի և Սանկտ Պետերբուրգի պայմանավորվածությունները պետք է կյանքի կոչվեն Ղարաբաղի շուրջ բանակցությունները վերսկսելու համար: Այս մասին լրագրողներին ասաց ՀՀ արտաքին գործերի նախարարի տեղակալ Շավարշ Քոչարյանը։
«Պատահական չէ, որ Վիեննայում ձևավորվեց այն մոտեցումը, որ մինչև կողմերի միջև չձևավորվի վստահության մթնոլորտ, անհնարին է բանակցային գործընթացում խոսել առաջընթացի մասին: Այդ վստահության մթնոլորտի բաղկացուցիչ մասը, անհրաժեշտ, բայց ոչ բավարար պայմանը հենց այն է, որ չկրակեն, սադրանքներ չլինեն, և դրա արդյունքը ժողովուրդը պետք է տեսնի։ Ըստ էության՝ Վիեննան և Սանկտ Պետերբուրգը դա են պահանջում»,- ասաց նա:
Փոխնախարարը նկատեց, որ խնդիրը ոչ թե Ադրբեջանի նախագահ Իլհամ Ալիևին բանակցային սեղանի շուրջ բերելն է, այլ այն, որ նա կատարի ստանձնած պարտավորությունները:
«Խնդիրն այն է, որ նա համառորեն արհամարհում է իր ստանձնած պարտավորությունները, գործում է հակառակ միջնորդների կոչերին, հորդորներին: Դա նաև պարտադրում է միջնորդներին գնահատական տալ այդ երկրի նկատմամբ», — ընդգծեց Շավարշ Քոչարյանը:
