ԵՐԵՎԱՆ, 29 հունիսի — Sputnik. Հայտնի երաժիշտ, Paris Guitar Foundation-ի նախագահ, Փարիզի երկու կոնսերվատորիաների պրոֆեսոր, միջազգային բազմաթիվ մրցույթների դափնեկիր Ագուստին Պեսնոնը հիացած է Հայաստանի բնությամբ։
Ֆրանսիացի կիթառահարը մասնակցեց Կիթառի միջազգային 3-րդ փառատոնի բացմանը, որն անցկացվեց Երևանում: Մինչ այդ նա ելույթ էր ունեցել նաև Գանձասարում (Արցախ):
«Հիացած եմ Հայաստանով ու Արցախով, հատկապես՝ Գանձասարի գեղեցկությամբ։ Ինձ համար Հայաստանի լեռները բացահայտում էին։ Հրաշալի բնություն է։ Եղել եմ նաև Մատենադարանում և անչափ տպավորված եմ», — լրագրողներին ասաց երաժիշտը։
Նրա խոսքով` մինչ Հայաստան գալը ծանոթ է եղել միայն կիթառահար Ժորա Սարգսյանի արվեստին:
«Սակայն Կոնսերվատորիայում դասավանդելով` տեսնում եմ, որ հայ ուսանողների մեջ տաղանդավոր երաժիշտներ կան, որոնք դաշնամուր և ջութակ հիանալի են նվագում։ Դուք հրաշալի երաժիշտներ եք», — նշեց Պեսնոնը։
Փառատոնի գեղարվեստական ղեկավար, Երևանի կիթառահարների ասոցիացիայի նախագահ, Գերմանիայի Վուպպերտալի կիթառահարների միջազգային ասոցիացիայի փոխնախագահ, միջազգային մրցույթների դափնեկիր, արվեստագիտության դոկտոր Ժորա Սարգսյանը մինչ բեմ դուրս գալը նշեց, որ այս տարի միջոցառումն անցկացվում է հունիսի 29-ից հուլիսի 9-ը։
«Մասնակիցների թվում են Ագուստին Պեսնոնը Ֆրանսիայից, Վլադիմիր Կիրասիրովը, Եվգենի Մորկովը Ռուսաստանից։ Փառատոնի շրջանակում երաժիշտները կկարողանան դուետ, տրիո, կվարտետ ու համույթ կազմել։ Այս տարի ամեն ինչ նոր է` արտիստները, երաժշտությունը, փառատոնի աշխարհագրությունը, պատանի կիթառահարների ներգրավվածությունը», — ավելացրեց Սարգսյանը։
Պեսնոնն ու Սարգսյանը կատարեցին Յոհան Կասպար Մեցի, Նապոլեոն Կոստի, Մանուել Մարիա Պոնսեի, Նիկիտա Կոշկինի, Յոհան Սեբաստիան Բախի, Ռոլան Դիենսի և Մաթիաս Դյուպլեսիի ստեղծագործությունները։
Նշենք, որ Կիթառի առաջին փառատոնը Հայաստանում անցկացվել է 2015 թվականին Վուպպերտալի կիթառահարների միջազգային ասոցիացիայի և Երևանի կիթառահարների ասոցիացիայի նախաձեռնությամբ։
Փառատոնի նպատակն է զարգացնել Հայաստանի դասական կիթառի արվեստը և դուրս գալ միջազգային հարթակ։
