ԵՐԵՎԱՆ, 28 հունիսի — Sputnik. Հայաստանի պաշտպանության նախարար Վիգեն Սարգսյանը կարծում է, որ Ադրբեջանի կողմից լայնածավալ գործողություններ սկսելը պարզապես անմտություն կլինի։
«Չկա պատերազմական գործողություններիայնպիսի զարգացում, որով Ղարաբաղի հարցը կարող է լուծվել Ադրբեջանի համար օգուտով», — հայտարարեց Վիգեն Սարգսյանը։
Նրա խոսքով` ընդհակառակը՝ կա շատ մեծ ռիսկ, որ լայնամասշտաբ պատերազմի պարագայում Ադրբեջանը կարող է ստանալ անուղղելի վնաս և՛ իր տնտեսության, և՛ պետության համար։
Ընդ որում` նախարարը չբացառեց, որ նման սպառնալիքներ կան նաև Հայաստանի համար։
«Ես չեմ նվազեցնում այն վտանգները, որ լայնամասշտաբ պատերազմը կարող է ունենալ Հայաստանի համար: Բացարձակ մեկը մյուսին չի բացառում», – ասաց Սարգսյանը։
Միևնույն ժամանակ Հայաստանի պաշտպանական գերատեսչության ղեկավարը չբացառեց տարբեր սադրանքների գնալու, հակամարտության սրացման և թիրախային հարվածներ հասցնելու հավանականությունը։
«Մենք պետք է միշտ պատրաստ լինենք, դրան այլընտրանք չկա», – ասաց Սարգսյանը։
Նրա խոսքով` պետք է սովորել ապրել նման պայմաններում, ամրապնդել անվտանգությունն ու զարգացնել երկիրը։
