ԵՐԵՎԱՆ, 28 հունիսի — Sputnik. Հայաստանը չի քննարկում Սիրիայում տեղի ունեցող գործընթացներին զինված ուժեր ներգրավելու հարցը: Այս մասին լրագրողներին ասաց ՀՀ պաշտպանության նախարար Վիգեն Սարգսյանը։
«Այս պահին այդպիսի հարց չի քննարկվում և չի քննարկվել նաև նախօրեին տեղի ունեցած Անվտանգության խորհրդի նիստում»,- ասաց նախարարը։
Սակայն Սարգսյանը չբացառեց նաև, որ կարող է այնպիսի իրավիճակ ստեղծվել, որ Հայաստանը որպես պետություն մասնակցելու ցանկություն ունենա, եթե այնտեղ լինեն բոլոր անհրաժեշտ նախապայմանները:
«Այդ դեպքում էլ խոսքը կարող է լինել ոչ թե ժամկետային, այլ պայմանագրային զինծառայողների ներգրավման մասին, նրանց կամքով, ինչպես Հայաստանի խաղաղապահ այլ առաքելությունների դեպքում»,- ասաց Սարգսյանը:
Նա միաժամանակ նշեց, որ դժվար թե առաջիկայում այդպիսի որոշում կայացվի։
