ԵՐԵՎԱՆ, 28 հունիսի – Sputnik. Հայաստանի ՊՆ–ն բավարարված է Ռուսաստանի հետ ռազմատեխնիկական համագործակցության մակարդակով։ Այս մասին լրագրողներին ասաց Հայաստանի պաշտպանության նախարար Վիգեն Սարգսյանը։
«Մենք Ռուսաստանի հետ ունենք փոխգործակցության մե՛ր ծրագիրը՝ դա ռազմավարական գործընկերության դաշնակցային հարաբերություններով պայմանավորված ռազմատեխնիկական-ռազմաքաղաքական փոխգործակցության ծրագիր է, մենք բավարարված ենք նրանով, թե ինչպես է այդ ծրագիրը իրականացվում», – ասաց Սարգսյանը։
Նրա խոսքով` փոխգործակցությունը պարբերաբար ընդլայնվում է, ու այն հարցերը, որոնք բարձրացվում են երկխոսության ընթացքում, ավելի կայուն էֆեկտ ունեն և ավելի կարևոր են, քան այս կամ այն տեխնիկայի մատակարարումը։
«Մենք Ռուսաստանից ստանում ենք այն զենքն ու ռազմամթերքը, որը գնում ենք, ստանում ենք ռազմատեխնիկական համագործակցության շրջանակում… Մենք այն ձեռք ենք բերում ՌԴ ներքին գներով դաշնակցային հարաբերությունների շրջանակում, դա շատ կարևոր շուկա է մեզ համար», – ասաց Սարգսյանը։
Ավելի վաղ Ռուսաստանի ռազմատեխնիկական համագործակցության դաշնային ծառայության տնօրեն Դմիտրի Շուգաևն ասել էր, որ Ռուսաստանը 2017 թվականին կշարունակի ռազմամթերք մատակարարել Հայաստանին։ Խոսքը վերաբերում է, առաջին հերթին, ավիացիոն տեխնիկային (մասնավորապես` ուղղաթիռներ, ՀՕՊ համակարգեր և զրահատեխնիկա)։ Երևանը հայ-ռուսական պայմանագրի շրջանակում 200 մլն դոլարի վարկ էր ստացել զենք գնելու համար։ 2015 թվականին ստորագրված համաձայնագրով նախատեսվում էր ռուսական արտադրության ռազմամթերք գնել։ Համաձայնագիրը ստորագրվել է դեռևս 2015 թվականի հունիսի 25-ին, սակայն ուժի մեջ է մտել միայն 2016 թվականի փետրվարի 10-ին։
