47 տարի առաջ՝ հունիսի 28-ին, Երևանում անսովոր իրարանցում էր։ Երևանյան կենդանաբանական այգուց 1970 թ-ի հունիսի 28-ին Վովա փիղը դուրս էր եկել Երևանի կենդանաբանական այգու տարածքից, իջել Մյասնիկյան փողոցով և գրեթե հասել փողոցի սկիզբում գտնվող կամրջի մոտ։
Զինվորականները տանկերով փակել էին փղի ճանապարհը` թույլ չտալով կատաղած կենդանուն հասնել քաղաքի բանուկ հատվածը։
Անկառավարելի կենդանին իր ճանապարհին ժանիքներով ճեղքում ու շրջում էր մեքենաները։
Երբ փղին կենդանաբանական այգի վերադարձնելու հույսը մարեց, որոշվեց ամեն գնով ազատվել մոլեգնած կենդանուց։
Վովայի վրա արձակված կրակահերթը հարցը չի լուծում, վիրավոր կենդանին էլ ավելի է մոլեգնում` իր ճանապարհին ոչնչացնելով բոլոր արգելքները։ Որոշվում է կենդանուն տանկով հաղթել։ Ականատեսները վկայում են, որ նույնիսկ տանկի մի քանի հարվածներից հետո էլ վիրավոր փիղը մի քանի ժամ շարունակում էր կենդանի մնալ։
Ժամեր անց միայն փղի անկենդան, արյունոտված մարմինը վերադարձրեցին կենդանաբանական այգի և դանով կերակրեցին մյուս գազաններին։
Ու, թեև Վովայի դաժան սպանությունը տեղի էր ունեցել ամբողջ Երևանի աչքի առաջ, բայց նման դաժանությունը չէր կարող հայտնվել խորհրդային լրատվամիջոցներում։
Հաջորդ օրը կենտրոնական թերթերը գրեցին` Երևանի կենդանաբանական այգուց փախած փղին հաջողվել է վերադարձնել, նա այժմ գտնվում է իր տեղում:
