ԵՐԵՎԱՆ, 28 հունիսի — Sputnik. Հուլիսի 1-ին մեկնարկող ամառային զորակոչի առթիվ արդեն անցկացվել է միջգերատեսչական զորակոչային հանձնաժողովի նիստ, որի ընթացքում տրվել են հանձնարարականներ նախազորակոչային կցագրման, զորակոչիկներին իրազեկման համար: Այս մասին հունիսի 28-ին լրագրողների հետ հանդիպման ժամանակ ասաց ՀՀ պաշտպանության նախարար Վիգեն Սարգսյանը:
Նա տեղեկացրեց, որ կենտրոնական հավաքակայանում ստեղծված են նոր, ավելի բարելավված պայմաններ։
«Այս զորակոչից սկսած նորակոչիկներն անմիջապես հավաքակայանում անցնելու են բանակային սննդի և այլևս տնից սնունդ բերելու կարիք չի լինի: Այն նաև թույլ չի տրվելու, քանի որ շոգ եղանակով պայմանավորված կարող են առողջական խնդիրներ առաջանալ։ Բնականաբար, մինչև զորամաս հասնելը ևս նորակոչիկները սնունդ կստանան»,- ասաց նախարարը:
