ԵՐԵՎԱՆ, 28 հունիսի — Sputnik. Փողոցային մրցավազքերի մասնակից Մառա Բաղդասարյանը բողոքել է Ռուսաստանի նախագահ Վլադիմիր Պուտինին դատարանի աշխատակիցներից, ՌԻԱ Նովոստիին հայտնել է նրա փաստաբան Դավիդ Կեմուլարիան։
«Մենք բողոք ենք ներկայացրել դատավորի և դատարանի աշխատակիցների դեմ։ Մեզ սպառնում են, ասում են, որ Մառային, ամեն դեպքում, ձերբակալելու են»,– ասաց փաստաբանը։
Նա պարզաբանեց, որ հենց նախագահի ընդունարանից Բաղդասարյանը գնացել է հարկադիր աշխատանքների, ինչին նրան դատապարտել են տուգանքները չվճարելու համար։ Փաստաբանը դեռ չի դիմել այլ իրավապահ մարմինների սպառնալիքի մասին դիմումով, քանի որ «հույսը դրել է նախագահի վրա»։ Նրա խոսքով՝ Բաղդասարյանի դիմումի պատասխանը պետք է գա մեկ շաբաթից։
Երկուշաբթի մրցարշավորդ Մառա Բաղդասարյանը ձերբակալվել է հարկադիր աշխատանքները բաց թողելու համար։ Նրան 15 օր ազատազրկում էր սպառնում։
Մառա Բաղդասարյանը 2016 թվականի մայիսին հայտնի է դարձել որպես Gelandewagen-ով սկանդալային մրցավազքի մասնակից ։ Նրան ձերբակալել են 2016 թվականի նոյեմբերին Մոսկվայի Լենինի անվան պողոտայում։
Ոստիկանության աշխատակիցները վարչական տուգանք են նշանակել սխալ կայանած ավտոմեքենայի համար, սակայն փաստաթղթերը ստուգելու ընթացքում տեսուչները հայտնաբերել են, որ աղջիկը չի վճարել 16 տուգանք։
Ավելի ուշ նա դատապարտվել է ուղղիչ աշխատանքներից խուսափելու համար կեղծ հիվանդության թերթիկ ներկայացնելու պատճառով։
