ԵՐԵՎԱՆ, 26 հունիսի — Sputnik. Սանկտ Պետերբուրգի մետրոյում ապրիլի 3-ին ահաբեկչություն իրականացրած անձն ու կազմակերպիչն օգտագործել են Telegram մեսենջերը: Այս մասին հայտնում է ՌԴ Անվտանգության դաշնային ծառայությունը։
«Սանկտ Պետերբուրգի մետրոպոլիտենում ապրիլի 3-ին տեղի ունեցած ահաբեկչության հետաքննության ընթացքում Ռուսաստանի անվտանգության դաշնային ծառայությունը ստացել է լիարժեք տեղեկություն, որ մահապարտ ահաբեկիչը, նրա հանցակիցներն ու օտարերկրացի կազմակերպիչն օգտագործել են Telegram մեսենջերը՝ կազմակերպման բոլոր փուլերում իրենց հանցավոր մտադրությունները թաքցնելու և ահաբեկչական հարձակումը նախապատրաստելու համար», – գրված է հաղորդագրության մեջ։
Ավելի վաղ Ռոսկոմնադզորի ղեկավար Ալեքսանդր Ժարովը Telegram–ի թիմին ու անձամբ մեսենջերի հեղինակ Պավել Դուրովին կոչ էր արել գրանցվել տեղեկատվության տարածման կազմակերպիչների ռեեստրում։
Ժարովը նշել էր, որ իրենց ներկայացրած պահանջի կատարման համար քիչ ժամանակ է մնացել։ Պահանջն անտեսելու դեպքում մեսենջերը կարգելափակվի ՌԴ–ի տարածքում։ Ավելի ուշ նա բացատրել էր, որ Ռոսկոմնադզորը չի պատրաստվում Telegram–ն արգելափակել հենց «վաղը», բայց Դուրովի պատասխան տալու ժամկետն ավարտվում է։
Դուրովն ի պատասխան հայտարարել էր, որ Ռուսաստանի նկատմամբ չեզոք դիրք ունեցող ծառայությունն արգելափակելը երկրի շահերից չի բխում, քանի որ մյուս մեսենջերները` WhatsApp–ը կամ Facebook Messenger–ը, ԱՄՆ–ն վերահսկում է։ Նա բացատրել էր, որ այսօր գաղտնի տեղեկության փոխանակումը կառուցվում է վերջնական կոդավորման վրա, որի հասանելիություն չունեն և ունենալ չեն կարող մեսենջերի սեփականատերերը, դրանք պահպանվում են օգտատերերի սարքերում։ Դուրովն ավելացրել էր, որ «Telegram–ի արգելափակումը չի դժվարացնի ահաբեկիչների և թմրանյութի բիզնեսով զբաղվողների աշխատանքը, նրանց տրամադրության տակ կան տասնյակ այլ մեսենջերներ»։
Ըստ նրա` «այդ դեպքում ահաբեկչությանը հաղթելու համար ստիպված պետք է լինեն արգելափակել համացանցը»։
