ԵՐԵՎԱՆ, 26 հունիսի — Sputnik. «ՌուսՀիդրո» էներգետիկ հոլդինգը շարունակում է բանակցություններ վարել Հայաստանի Սևան-Հրազդան ՀԷԿ կասկադի վաճառքի շուրջ, հայտնում է ՌԻԱ Նովոստին` հղում անելով ընկերության նախագահ Նիկոլայ Շուլգինովին։
Ապրիլին ընկերության փոխտնօրեն Ջորջ Ռիժինաշվիլին հայտնել էր, որ «Ռուսհիդրոյի» վարչությունը մոտակա երկու-երեք ամիսների ընթացքում նախատեսում է դիտարկել Հայաստանի Սևան-Հրազդան ՀԷԿ կասկադի վաճառքի հնարավորությունը։
Շուլգինովի խոսքով` ընկերությունը բանակցություններ է վարում կասկադի վաճառքի շուրջ արդեն երկրորդ գնորդի հետ, քանի որ առաջինն «արդեն գնացել է»։
«Առաջարկը մեզ ձեռնտու չէ։ Հենց գայթակղիչ առաջարկներ լինեն` մենք կասենք»,– հայտնել է Շուլգինովը։
Հարցին, թե արդյո՞ք բանակցություններ են ընթանում հայկական ընկերության հետ, Շուլգինովը պատասխանել է, որ ընկերությունն աշխատում է Ռուսաստանում։
Սևան-Հրազդան կասկադն ունի Հրազդան գետի վրա տեղակայված 7 ճյուղավորված հիդրոէլեկտրակայան: Կայանների վրա տեղադրված է 561 ՄՎտ ընդհանուր հզորությամբ 21 հիդրոագրեգատ, կասկադի կայանների միջին տարեկան արտադրանքը 501 մլն կՎտ/ժ է, ինչը կազմում է 2009 թ. ՀՀ էլեկտրաէներգիայի ընդհանուր արտադրության մոտ 9%-ը:
«Ռուսհիդրոն» գնման գործարքն ավարտել է 2011 թվականի մարտին։ «Միջազգային էներգետիկ կորպորացիայի» բաժնետոմսերի փաթեթը, որի հիմնական ակտիվը Սևան-Հրազդան ՀԷԿ կասկադն է, «Ռուսհիդրոյի» դուստր ընկերությունը գնել է Inter RAO Holding B.V ընկերությունից։
