Եթե բերքի կեսի կեսն էլ կամ մեկ քառորդը հաջողվի հավաքել ու վաճառել, ապա Մրգաստանի գյուղացիներն այն կվաճառեն նախատեսվածից մի քանի անգամ էժան ու դարձյալ կկանգնեն հին տաշտակի առջև: Գյուղացիները պարտք են հնարավոր բոլոր բանկերին ու վարկային կազմակերպություններին: Դեռ նախորդ տարիների վարկերը չմարած` այս գարնանն էլ նոր պարտք են կուտակել:
Լևիկ պապը 250 ծիրանի ծառ ունի, ինչպես նախորդ տարի, այս տարի էլ ծիրանից եկամուտ ստանալու հույս չունի: Անցած տարի նրա 250 ծառի վնասված բերքի դիմաց կառավարությունը հաշվարկել ու փոխհատուցում էր հատկացրել 25 հազար դրամ:
Այս տարի գյուղը դեռ սպասում է կառավարության պատասխանին: Բայց և միաժամանակ գործադիրին քայլեր է հուշում նախորդ տարիների դառը փորձերը աչքի առաջ ունենալով:
Մրգաստանի ու կարկտահարված բոլոր գյուղերի խնդիրներին մասին կառավարությունը շատ լավ գիտի։ Գյուղատնտեսության պատասխանատուները գյուղերում եղել են, իրենց աչքով տեսել վնասված դաշտերը, ավելին` հարցը հնչել է նաև երկրի գլխավոր ամբիոնից։
