ԵՐԵՎԱՆ, 25 հունիսի — Sputnik. Կանանց ազգային հավաքականի գլխավոր մարզիչ Արտաշես Ներսիսյանը Հայաստանի ազգային օլիմպական կոմիտեի լրատվական ծառայությանը հայտնել է, որ գոհ է Սոնա Պողոսյանի և Արփինե Դալալյանի մասնակցությունից։
«Կիլոգրամների առումով ինչ սպասում էի, եղավ: Սոնան ուսի վնասվածք և նստաներվի բորբոքում ուներ: Բայց որոշակի ցավեր ունենալով՝ կարողացավ մեդալ նվաճել իր և հավաքականի համար: Դա Սոնայի առաջին մեդալն էր աշխարհի առաջնություններում: Ինչ վերաբերում է Արփինե Դալալյանին, երևում է, որ նա սկսել է աճել, մրցահարթակում հասունանալ: Տոկիոյում Արփինեն կայուն հանդես եկավ, անձնական արդյունքը բարելավեց 14 կգ-ով՝ զբաղեցնելով չորրորդ տեղն աշխարհում: Նա 18 տարեկան է և դեռ երկու տարի ունի այս տարիքային խմբում հանդես գալու համար», — ասել է Ներսիսյանը:
Մարզիչը նաև հայտնել է, որ Սոնա Պողոսյանն ու Արփինե Դալալյանն այժմ սկսելու են նախապատրաստվել հոկտեմբերին կայանալիք Եվրոպայի երիտասարդական առաջնությանը:
