Պրոֆեսոր Գայանե Հախնազարյանը Բաբաջանյանի անվան երիտասարդ դաշնակահարների միջազգային փառատոնում ունկնդրել է հայ երեխաներին ու հիացել նրանց կատարումներով։
«Մեծ բավականություն ստացա, որովհետև շատ տաղանդավոր երեխաներ էին ելույթ ունենում, նրանք իսկապես մեր ազգի ապագան են»,- ասաց Հախնազարյանը։
Երաժշտի խոսքով` թեև երեխաներից շատերը դժվար պայմաններում են ապրում, այնուհանդերձ մեծ սեր ունեն երաժշտության ու մշակույթի նկատմամբ։
«Իսկ ես համարում եմ, որ մշակույթ և տաղանդներ ունեցող ազգը շատ երկար կգոյատևի»,- ընդգծեց Հախնազարյանը։
Ըստ նրա` մի ցավալի փաստ կա. մարդիկ, որոնցից կախված է այդ երեխաների ուսման ֆինանսավորումը, դեռ բավականաչափ չեն գիտակցում, որ այդ երեխաներին օգնելու դեպքում մեծ գործ արած կլինեն։
«Աշխարհում շատ մրցույթներ կան, որոնց մասնակցելու ցանկություն կա, բայց դրա համար գումարներ են պետք։ Ծնողներն էլ չեն կարողանում հոգալ այդ ծախսերը։ Եթե հովանավորների թիվը մեծանա, ապա այդ օգնությունը շատ մեծ դեր կխաղա։ Դրսում կլսեն հայ երեխաների կատարումները, և աշխարհը Հայաստանի մասին ավելի մեծ կարծիք կունենա»,- ասաց Հախնազարյանը։
Դաշնակահարի խոսքով` եթե գումար ունեցող անհատները լսեն երեխաների կենդանի կատարումները, գուցե ինչ-որ կերպ ոգևորվեն և հավատան, որ իրենց ֆինանսական օգնությունն իսկապես պետք է։
