ԵՐԵՎԱՆ, 24 հունիսի — Sputnik. Այսօր` հունիսի 24-ի առավոտյան Վարդենիս-Շորժա հատվածի 25-րդ կմ-ին ՊՆ պետհամարանիշով «ԳԱԶ 66» մակնիշի ավտոմեքենան դուրս էր եկել ավտոճանապարհի երթևեկելի հատվածից և մոտ 6 մ սահել մոտակա ձորակը: Մեքենայում եղած զինծառայողներից 8-ին տեղափոխել էին Երևան:
«Բոլոր 8 զինծառայողները գտնվում են Մուրացանի հոսպիտալում։ Որևէ զինծառայողի կյանքին վտանգ չի սպառնում»,- ֆեյսբուքյան իր էջում գրել է ՀՀ ՊՆ մամուլի քարտուղար Արծրուն Հովհաննիսյանը:
Ըստ նրա՝ զինծառայողներին մատուցվում է անհրաժեշտ բժշկական օգնություն։
Արտակարգ իրավիճակների նախարարությունն ավելի վաղ հայտնել էր, որ մեքենայում եղած ուղևորներից 14-ին տարբեր աստիճանի մարմնական վնասվածքներով տեղափոխել են Վարդենիսի զինվորական հոսպիտալ, որտեղ բժիշկները 7 տուժածի առողջական վիճակը գնահատել են ծանր, իսկ մյուս 7-ինը՝ միջին ծանրության: Փրկարարները 2 տուժածի ցուցաբերել էին առաջին բուժօգնություն, և նրանք հրաժարվել էին հոսպիտալացումից:
