ԵՐԵՎԱՆ, 24 հունիսի — Sputnik. 64 կգ քաշային կարգում Հովհաննես Բաչկովն այսօր բռնցքամարտի Եվրոպայի առաջնության եզրափակիչում մրցեց անգլիացի Լյուկ Մաքմորմեկի դեմ: Հայ բռնցքամարտիկը հիանալի մենամարտ անցկացրեց ու արժանի կերպով նվաճեց Եվրոպայի չեմպիոնի կոչումը:
Առաջին ռաունդում ավելի հաջողակ էր գործում անգլիացին: Բաչկովն անընդհատ նախաձեռնողի դերում էր, բայց բաց թողեց մի քանի հարված: Երկրորդ ռաունդի հենց սկզբից հայ բռնցքմարտիկը նետվեց առաջ, ու մի քանի անգամ արդեն ագլիացին բաց թողեց բավականին ուժեղ հարվածներ: Ռաունդի վերջում Բաչկովը շատ լավ գրոհ անցկացրեց ու անկասկած հաղթեց այդ ռաունդը:
Երրորդ ռաունդում Բաչկովը հիանալի մենամարտ անցկացրեց: Հաճախ հարվածների փոխանակման գնալով՝ հայ բռնցքամարտիկը նպատակին հասցրեց իր հարածների հիմնական մասը, ու մրցավարները միաձայն որոշմամբ 5:0 հաշվով հաղթանակը շնորհեցին Հովհաննես Բաչկովին:
Այսպիսով Հովհաննես Բաչկովը յոթ տարվա ընդմիջումից հետո հռչակվեց Եվրոպայի չեմպիոն: Վերջին անգամ հայ բռնցքամարտիկներից Եվրոպայի չեմպիոնի կոչումը նվաճել էր Հրաչիկ Ջավախյանը 2010 թվականին:
