ԵՐԵՎԱՆ, 24 հունիսի — Sputnik. Վանաձորում ծնունդների աննախադեպ ցուցանիշ է գրանցվել` 12 երեխա մեկ օրում:
«Մեկ օրվա ընթացքում 12 երեխայի ծնունդը մեզ համար հաճելի անակնկալ էր», — Sputnik Արմենիային ասաց «Վանաձոր» բժշկական կենտրոնի ծննդատան բաժանմունքի ղեկավար, մարզի գլխավոր գինեկոլոգ Արամ Ավալյանը:
12 երեխաները ծնվել են Վանաձորում հունիսի 20-ի ժամը 18.00-ից մինչև հունիսի 21-ի ժամը 18.00-ն ընկած ժամանակահատվածում: Ընդ որում՝ տղաների և աղջիկների քանակը նույնն է եղել` 6 տղա և 6 աղջիկ:
«Եղել են դեպքեր, երբ 7-8 երեխա է ծնվել, բայց 12-ը մեկ օրում` մեզ համար սա բացառիկ հաջողություն է», — ասաց Ավալյանը:
Նա հայտնեց, որ բոլոր երեխաները տարբեր ընտանիքներում են ծնվել, այսինքն 12 ծննդկան է եղել: Նորածինների և մայրերի վիճակը լավ է, բոլորն էլ առողջ են:
«Ծնելիության մակարդակի նվազման պայմաններում այս դեպքն, իհարկե, հատկանշական է», — ասաց Վանաձորի գլխավոր գինեկոլոգը:
Ավալյանը նշեց, որ իր հիշելով երեխաների ռեկորդային թիվը 14-ն է եղել, բայց այդ դեպքից հետո շատ տարիներ են անցել:
