ԵՐԵՎԱՆ, 23 հունիսի — Sputnik. Ռուսաստանում ՀՀ արտակարգ և լիազոր դեսպանն առաջարկել է Օրլովի շրջանում Հայաստանի առևտրի տուն բացել։ Sputnik Արմենիային այդ մասին հայտնում է Օրլովի շրջանի կառավարության և համայնքապետի մամուլի ծառայությունը։
«Հայաստանն ու Ռուսաստանը կարողացան արդյունավետ երկխոսություն հաստատել` կապված տնտեսական և մշակութային համագործակցության հետ։ Այցս Օրլովի շրջան ինձ համար հատկապես կարևոր է, քանի որ այն տեղի է ունենում իմ դիվանագիտական առաքելության սկզբում», – ասել է Տողանյանը։ Նրա խոսքով` Հայաստանը բարձր է գնահատում շրջանի ներդրումային, արտադրական, գյուղատնտեսական և առևտրային ներուժը։
Տողանյանը հատուկ ուշադրություն հրավիրեց Օրլովի շրջանում Հայաստանի առևտրի տան բացման թեմային, ինչպես նաև փոխգործակցության մարդասիրական ասպեկտների զարգացմանը։
«Մեզ հետաքրքրում է այլ պետություններից և տարածաշրջաններից գործընկերների ներգրավմամբ բազմակողմանի համագործակցության ձևաչափը։ Հաշվի առնելով առկա բեռնափոխադրումային առավելությունները`շրջանը լավ հարթակ կարող է դառնալ նման փորձի իրականացման համար», – ընդգծել է Տողանյանը։ Օրլովի շրջանի համայնքապետ Վադիմ Պոտոմսկին իր հերթին շնորհակալություն է հայտնել հայկական պատվիրակության ներկայացուցիչներին` Օրլովի շրջանին նկատմամբ ունեցած հատուկ ուշադրության և վստահելի բարեկամական և գործարար կապերը պահպանելու շահագրգռվածության համար։
«Այսօր մեր նպատակն է ցույց տալ Օրլովշինայի բոլոր հնարավորությունները, ցույց տալ, թե որքանով է այն բաց` աշխատելու համար», – ասաց Պոտոմսկին։
Նրա խոսքով` տարածաշրջանում միմյանց հետ համերաշխ ապրում են տարբեր ժողովուրդների ու կրոնական դավանանքի ներկայացուցիչներ, առավելագույն հարմարավետ պայմաններ են ստեղծվել բիզնեսի համար, մասնավորապես, հարկային արտոնություններ են նախատեսված նոր արդյունաբերական տարածքների տեղակայման համար։ ՀՀ–ի հետ տարածաշրջանի համագործակցության հեռանկարների քննարկմանը մասնակցել են նաև Օրլովի շրջանի կառավարության ներկայացուցիչներ, ինչպես նաև Օրլովի առևտրա–արդյունաբերական պալատի ղեկավար Սվետլանա Կովալյովան, «Հայկական մշակութալուսավորչական կենտրոն» Օրլովի տարածաշրջանային ՀԿ–ի ղեկավար Պայծառ Դանիելյանը և բուհերի ռեկտորներ։
