Նախատեսված ներդրումների մոտավորապես 37–40 տոկոսն արդեն իրականացվել է։ Այս մասին կառավարության նիստից հետո լրագրողների հետ զրույցում ասաց տնտեսական զարգացման և ներդրումների նախարար Սուրեն Կարայանը։
«Ես անուններ տալ չեմ կարող, միշտ ասել եմ, որ դա առևտրային գաղտնիք է»,–ասաց Կարայանը։
Լրագրողները հիշեցրին, որ վերջերս Տաջիկստանի նախագահն էր այցելել Հայաստան։ Այցի ընթացքում կարևորվեցին հայ-տաջիկական բարեկամական հարաբերությունների զարգացումն ու փոխադարձ հետաքրքրություն ներկայացնող ոլորտներում համագործակցության խորացումը։ Հետևաբար հարց հնչեց` ի՞նչ ակնկալիք ունենք Տաջիկստանի ներդրողներից։
«Նրանցից համագործակցության ակնկալիք ունենք, որպեսզի ապրանքաշրջանառությունն աճի։ Կոնկրետ ոլորտների մասով ունենք համագործակցություններ, մոտ ժամանակներս օգոստոսի վերջ, սեպտեմբերի սկիզբ տաջիկական կողմից այց կլինի, նաև մենք կայցելենք այնտեղ։ Միաժամանակ մենք բիզնես ֆորում իրականացրեցինք, որի արդյունքում ստորագրվեցին 8–9 պայմանագրեր»,–ասաց նախարարը։
Կարայանը նշեց, որ համագործակցության հիմնական եզրերը վերաբերում են գյուղմթերքի վերամշակմանն ու ոսկեգործությանը, ադամանդագործությանը։
Վերջում նա տեղեկացրեց, որ այս ապահն ուսումնասիրություններ են իրականացնում ու հաշվարկներ կատարում ներդրողներին ՀՀ քաղաքացիություն շնորհելու վերաբերյալ։
