ԵՐԵՎԱՆ, 22 հունիսի — Sputnik. Հայ օդաչու, Խորհրդային Միության հերոս Սերգեյ Բուռնազյանի կիսանդրին տեղադրվել է Վորոնեժի մարզում` «Մայր հայրենիք» հուշահամալիրի տարածքում։ Այս մասին հայտնում է «Վորոնեժի տեսաբան» կայքը։
Բրոնզե քանդակը, որի հեղինակը քանդակագործ Վիկտոր Գրիշչենկոն է, տեղադրվել է զինվորական գերեզմանոցում։
Կայքի տեղեկություններով` քանդակի ֆինանսական ծախսերը հատկացվել են արտաբյուջետային միջոցներից, իսկ հասարակական կազմակերպություններից մեկն էլ հոգացել է քանդակի հարակից տարածքը բարեկարգելու ծախսերը։
Սերգեյ Բուռնազյանը ծնվել է 1918 թվականին Ռոստովի մարզում։ Կարմիր բանակի շարքերն է ընդգրկվել 1938 թվականին։
Ավարտել է Խերսոնի ավիաուսումնարանը։ 1941-1945 թվականների Հայրենական մեծ պատերազմի ժամանակ ծառայել է կործանիչ ավիացիայում (1942 թվականի հոկտեմբերից՝ էսկադրիլիայի հրամանատար)։
Մասնակցել է Բրյանսկի, Խարկովի շրջաններում մղված մարտերին, Ստալինգրադյան և Հարավային ռազմաճակատների գործողություններին։
Կատարել է 244 մարտական թռիչք, ոչնչացրել թշնամու 24 ինքնաթիռ, որոնցից 10-ը միայն մեկ օրվա՝ 1942 թվականի սեպտեմբերի 8-ի ընթացքում։
Սերգեյ Բուռնազյանի անունով են կոչվել Հայաստանի ավիամարզական ակումբը, Երևանի փողոցներից մեկը։
