ԵՐԵՎԱՆ, 22 հունիսի — Sputnik. Տուլայի շրջանում հունիսի 18-ին վթարված Երեւան-Մոսկվա միկրոավտոբուսի վարորդ Կարապետ Մողրովյանը երկու ամսով կալանավորվել է։ Այս մասին հայտնում է Տուլայի լրատվական ծառայությունը։
Հիշեցնենք, որ վթարը տեղի է ունեցել հունիսի 18–ի ցերեկը։ Ռուսաստանի Դաշնության Տուլայի շրջանում` Մ-4 դաշնային ավտոճանապարհի Մոսկվա-Երևան հատվածի 133-րդ կմ-ին բախվել էին «ԿամԱԶ» մակնիշի բեռնատար ավտոմեքենան և երթուղային միկրոավտոբուսը, որում եղել էր 20 մարդ։ Բախման հետևանքով մահացել էր 1961 թվականին ծնված Ռուսաստանի քաղաքացի Օտար Նասիրովը, ինը մարդ վնասվածքներ էին ստացել (երեքը` երեխաներ)։ Միկրոավտոբուսն ընթանում էր «Երևան – Նիժնի Նովգորոդ» երթուղով։ Բոլոր տուժողները Հայաստանի քաղաքացիներ էին։
Տվյալ փաստով քրեական գործ է հարուցվել ՌԴ ՔՕ 264 հոդ. 3 մասով (ավտոմեքենա կամ այլ մեխանիկական տրանսպորտային միջոց վարող անձի կողմից ճանապարհատրանսպորտային օրենքների խախտում, որի հետևանքով մարդ է մահացել)։ Այս հոդվածը մինչև հինգ տարի ազատազրկում է նախատեսում։
Դատարանին ներկայացրած նյութերից պարզ է դառնում, որ միկրոավտոբուսն է բախվել ԿամԱԶ–ին։
Միջնորդությունը բավարարելիս` դատավորը հաշվի է առել, որ մեղադրյալն այլ երկրի քաղաքացի է, Ռուսաստանի Դաշնությունում մշտական բնակավայր ու գրանցում չունի և ազատության մեջ լինելու դեպքում կարող է թաքնվել նախաքննական մարմիններից։
Դատարանը մեկ ամիս 28 օր ժամկետ է սահմանել կալանքի համար։
