ԵՐԵՎԱՆ, 22 հունիսի — Sputnik. 2015թ. պետբյուջեի «Կրթական օբյեկտների հիմնանորոգում» ծախսային ծրագրով, ըստ Երևանի ավագանու «Ելք» խմբակցության անդամ Անահիտ Բախշյանի, նախատեսված է եղել հիմնանորոգել Երևան քաղաքի 5 դպրոց, որոնց թվում` Մալաթիա Սեբաստիա վարչական շրջանի 191 հիմնական դպրոցը։
«Հիմնանորոգումը սկսվել է 29.01.2015թ., հատկացվել է 321 միլին 621 հազար դրամ, և 2016-2018թթ. ՀՀ կառավարության միջնաժամկետ ծրագրով նախատեսվել էր ավարտել 2016-ին: Արդեն 2017 թվականն է, սակայն դպրոցի վիճակը շատ տխուր է, որովհետև հիմնանորոգումը վաղուց դադարեցվել է, շինարարները կիսատ թողել-գնացել են ու 2 տարի է` չեն երևում դպրոցում: Մի մասնաշենքն առանց տանիքի է, պատերը գաջել են առանց տանիքի, այսինքն ներդրված գումարն արդեն անձրևը տարել է»,- նշում է Բախշյանը:
Նա նաև պարզել է, որ հիմնանորոգման աշխատանքներն, ըստ պայմանագրի, պետք է իրականացներ «Կանժիլստրոյ» ՍՊԸ-ն:
«Փաստորեն կառավարության ծրագիրը չի կատարվել, հայտնի չէ` գումարը ծախսվել է, թե ոչ և ընդհանրապես ուր է: 900 աշակերտ ունեցող դպրոցը ծվարել է տարածքի կեսում, և որոշ դասարանների երեխաներ ստիպված 2-րդ հերթով են հաճախում դպրոց, իսկ ՀՀ վարչապետը դպրոցների տնօրեններից պահանջում է վերացնել 2-րդ հերթը: Այս դպրոցի պարագայում 2-րդ հերթը վերացնելը պետք է պահանջել ՀՀ կառավարությունից»,- նշում է Բախշյանը:
Նա նաև հայտնում է, որ իր մտահոգությունները նամակով հայտնել է Երևանի քաղաքապետին, քանի որ դպրոցը քաղաքապետարանի ենթակայության տակ է, և Երևանի մասին օրենքով Երևանի քաղաքապետն է կազմակերպում Երևանի ենթակայության դպրոցների, մանկապարտեզների, ակումբների, մշակույթի տների, գրադարանների, կրթական և մշակութային այլ կազմակերպությունների գործունեությունը, դրանց շահագործման և նորոգման աշխատանքները:
Sputnik Արմենիան նույնպես դիմեց Երևանի քաղաքապետարան` դպրոցի հիմնանորոգման ճակատագրի մասին հավելյալ տեղեկություններ ստանալու ակնկալիքով։ Բայց հասարակայնության հետ կապերի վարչությունից մեզ խորհուրդ տվեցին դիմել Կրթության և գիտության նախարարություն` նշելով, որ ծրագրի պատասխանատուն այդ գերատեսչությունն է։
ԿԳՆ-ից, սակայն, մեզ նույնպես պատասխան չտվեցին` խոստանալով տեղեկատվությունը ճշտելուց հետո տրամադրել ավելի ուշ։
