ԵՐԵՎԱՆ, 19 հունիսի — Sputnik. Հունիսի 17-ին Արցախից Երևան տեղափոխված զինծառայողների վիճակը կայուն է, նրանք գտնվում են հսկողության ներքո: Իսկ այսօր Երևան ՊՆ կենտրոնական կլինիկական զինվորական հոսպիտալ տեղափոխված, հունիսի 17-ին Արցախում գլխի հրազենային թափանցող վիրավորում ստացած զինծառայողին՝ 1997 թ-ին ծնված Յուրի Զաքարյանին տեղափոխել են հոսպիտալի վերակենդանացման բաժանմունք։
Այս մասին լրագրողների հետ հանդիպման ժամանակ ասել է հոսպիտալի վերակենդանացման բաժանմունքի պետ Գայանե Հովհաննիսյանը:
«Վիճակը ծայրահեղ ծանր է, գիտակցություն չունի, արհեստական շնչառության ապարատին է միացված: Նրան Ստեփանակերտի հիվանդանոցում վիրահատել են, այստեղ հետազոտություն է իրականացվել, այս պահին վիրահատության անհրաժեշտություն չկա»,-մանրամասնել է նա:
Գայանե Հովհաննիսյանի խոսքով` զինծառայողի կյանքին վտանգ է սպառնում։
Անդրադառնալով հունիսի 17–ին Երևան տեղափոխված վիրավոր զինծառայողներին` հոսպիտալի վերակենդանացման բաժանմունքի պետն ասել է, որ նրանց 2-ի վիճակը կայուն է, գտնվում են մշտական հսկողության տակ:
1997թ.-ին ծնված Արմեն Վարդանյանը ականի պայթյունից գլխի շրջանում է վիրավորում ստացել: Նրա գիտակցությունը տեղն է, ինքնուրույն շնչում է, կոնտակտի մեջ է մտնում: Այս պահին վիրահատության կարիք չկա։ Իսկ աչքի շրջանում վիրավորում ստացած զինծառայողը Մալայան կենտրոնում վիրահատության է ենթարկվել։ Հնարավոր է, որ նրա տեսողությունը վերականգնվի։
