Պահպանել հայկական ժառանգությունը և չձուլվել նրանց օգնում է «Հայարտուն» կրթական կենտրոնը, հայկական դպրոցը, տարբեր հասարակական կազմակերպություններն ու եկեղեցիները։
Sputnik Արմենիան որոշեց զբոսնել հին Թբիլիսիի գեղեցիկ փողոցներով և պատմել այն տների և կառույցների մասին, որոնք պատկանում են թբիլիսյան հայերին։ Օրինակ, Թբիլիսիի կենտրոնական շրջաններից մեկում` Սոլոլակիում, ժամանակին հարուստ հայ մտավորականությունն էր ապրում։ Նրանց տներն այսօր թբիլիսյան հայերի պատմության կենդանի վկաներն են։ Այստեղ է գտնվում նաև հայտնի հայ գրող Հովհաննես Թումանյանի տունը։
Դրա հարևանությամբ` Ասատիանի (նախկինում` Բեյբուտովսկայա) փողոցի վրա ապրել են Օրբելյան եղբայրները։ Այստեղ է գտնվում նաև հայտնի հոլիվուդյան ռեժիսոր Ռուբեն Մամուլյանի հորական տունը։
Քաղաքի ամենամարդաշատ փողոցներից մեկում, ուր եռում է գիշերային կյանքը, Մանթաշյանի հայտնի առևտրային շարքերն էին։ Դրանք նախագծել է ինժեներ Սարգսյանը։ Նրա մտահաղացման համաձայն` առևտրային շարքերը պետք է դառնային Վրաստանի մայրաքաղաքի բիզնես–կենտրոնը։
Ավելի մանրամասն դիտեք «Ալինա Օրդյանի հետ. Ազնավուրի սենյակը, Կայծի լահմաջոն և ժակ Թեքեյանը հայրենիքում» հեղինակային ծրագրում։
