ԵՐԵՎԱՆ, 19 հունիսի, Արմենուհի Մխոյան. — Sputnik. Ձեռնարկությունների ինկուբատոր հիմնադրամը, Գյումրու տեխնոլոգիական կենտրոնը (ԳՏԿ) և «Լեգիոն» փեյնթբոլի ակումբի հետ համատեղ առաջին անգամ հունիսի 17-18-ը կազմակերպել էր ՏՏ ընկերությունների միջև փեյնթբոլի սիրողական մրցաշար՝ ՏՏ ընկերությունների մասնակցությամբ:
Մրցաշարն անցկացվեց Սևանա լճի ափին՝ «Լեգիոն» փեյնթբոլի ակումբի տարածքում: Մրցաշարին մասնակցելու հնարավորություն ունեցան ՏՏ ոլորտի ընկերությունները՝ Երևանից, Վանաձորից և Գյումրիից, յուրաքանչյուր թիմում՝ մինչև 8 մասնակից: Մինչ խաղի մեկնարկը ակումբի անդամները ներկաներին ծանոթացրին խաղին մասնակցելու պայմաններին, զենքից օգտվելու ու մրցավարության կանոններին: Խաղի մեկնարկից առաջ բոլորն արդեն ունեին զինվորական հանդերձանք, սաղավարտներ, ձեռնոցներ ու ներկող գնդակներով լիցքավորված զենքեր:
Փեյնթբոլ խաղալու ցանկություն հայտնել էին ինչպես արական, այնպես էլ իգական սեռի ներկայացուցիչները: Ի դեպ, երբեմն կանայք ու աղջիկները խաղի ընթացքում այնպես էին տարվում խաղով, որ մոռանալով իրականությունը` իրենց զգում էին ինչպես իրական «մարտի դաշտում», ու ո՛չ ֆիզիկական, ո՛չ էլ մարտավարական առումով հետ չէին մնում տղաներից:
«Լեգիոն» փեյնթբոլի ակումբի համահիմնադիր Արծրուն Հովհաննիսյանին զարմացրել էր ՏՏ ոլորտի ներկայացուցիչների ակտիվությունը։
«Այստեղ հերթական անգամ կոտրվում է այն կարծրատիպը, որ նոր սերունդն ակտիվ չէ: Պարզվում է՝ համակարգչային խաղերն էլ են օգնում նման խաղերն ավելի գրագետ անցկացնելու համար: Շատ ուրախ եմ ու ոգևորված»,- ասաց Հովհաննիսյանը:
Ինչպես ռազմամարզական մյուս խաղերը, փեյթբոլը նույնպես ֆիզիկական կոփվածության, հայրենասիրության, ռազմական գիտելիքների զարգացման առումով կարևոր խաղ է: Մարտավարական ունակությունների խորացում, ռազմական հմտությունների զարգացում ու թիմային համակարգված գործողություններ՝ սա է խաղի հիմնական նպատակը:
Խաղին հետևելու համար կան դատավորներ ու խաղի կանոններ, որն առաջին հերթին անվտանգության տեսանկյունից է կարևոր՝ խաղային զենքը կարող է նաև վնասել ու կապտուկներ առաջացնել:
«Առանց հստակ կանոնները պահպանելու հաղթող ու պարտվող որոշել հնարավոր չէ»,- ասաց Հովհաննիսյանը:
ԳՏԿ բիզնեսի զարգացման մենեջեր Ամալյա Եղոյանն էլ խոսեց փեյնթբոլի առաջնության նպատակի մասին։
«Փեյնթբոլի առաջնության նպատակն է տեխնոլոգիական ոլորտի ներկայացուցիչների համար ստեղծել շփման ոչ ֆորմալ միջավայր, ինչը շատ դեպքերում հանգեցնում է նորանոր համագործակցությունների»,- ասաց նա:
Բնական միջավայրում խաղը հնարավորություն էր տալիս թաքնվել ծառերի, քարերի, պատերի հետեւում ու թաքստոցներից իրար վրա կրակել: Խորամանկություն, դարանակալում, քայլերի թիմային պլանավորում. սրանք են գրավում խաղի մասնակիցներին: Թեև շատերի կապտուկները երկար ժամանակ հիշեցնել կտան խաղի մասին, բայց ադրենալինը շատերին կրկին խաղալու ձգտում առաջացրեց:
Պայքարն ավարտվեց, և հաղթողի տիտղոսին արժանացան ՎՕԼՕ և ԳՏՏԿ թիմերը։ Հաղթողները երկուսն էին, քանի որ երկարատև թեժ պայքարում պարտվող թիմ չգրանցվեց։ Թիմերի պաշտոնապես պարգևատրումը տեղի կունենա հունիսի 23-ին Երևանում, կազմակերպիչները վստահեցնում են` հաղթողներն իրենք քաջությանն ու հմտություններին արժանի մրցանակներ են ստանալու:
