ԵՐԵՎԱՆ, 19 հունիսի — Sputnik. Եվրոպայի առաջնությունում Հայաստանը ներկայացնող 64 կգ քաշային Հովհաննես Բաչկովը հաղթեց Մոլդովայի ներկայացուցչին և դուրս եկավ քառորդ եզրափակիչ։
Ուկրաինայի Խարկով քաղաքում ընթացող բռնցքամարտի Եվրոպայի առաջնությունում հայ բռնցքամարտիկները շարունակում են տպավորիչ ելույթները: Պայքարի մեջ մտած Հայաստանի 5 ներկայացուցիչները միայն հաղթանակներ են տոնել և դուրս էին եկել 1/8 եզրափակիչ:
Այսօր քառորդ եզրափակչի համար պայքարում է Հայաստանի հավաքականի 5 բռնցքամարտիկ, որից 3-ը անցկացնում են իրենց մեկնարկային մենամարտերը. 49 կգ քաշային Արթուր Հովհաննիսյանը, 64 կգ քաշային Հովհաննես Բաչկովը և 52 կգ քաշային Նարեկ Աբգարյանը, իսկ 69 կգ քաշային Վլադիմիր Մարգարյանն ու գերծանր քաշային Գուրգեն Հովհաննիսյանն իրենց 2-րդ մենամարտերն են անցկացնում:
