ԵՐԵՎԱՆ, 19 հունիսի — Sputnik. Տարածաշրջան կատարած վերջին այցից հետո ԵԱՀԿ Մինսկի խմբի համանախագահներ Իգոր Ստեպանովը, Ստեֆան Վիսկոնտին ու Ռիչարդ Հոուգլանդը հանդես են եկել հայտարարությամբ։
Հայտարարության մեջ նշվում է, որ միջնորդները հանդիպել են Հայաստանի նախագահ Սերժ Սարգսյանի հետ Երեւանում ու Ադրբեջանի նախագահ Իլհամ Ալիեւի հետ՝ Բաքվում։ Երկու մայրաքաղաքներում էլ անցկացվել են նաեւ խորհրդակցություններ արտաքին գործերի ու պաշտպանության նախարարների հետ։ Համանախագահները մեկնել են Արցախ հունիսի 12-ին, որպեսզի հանդիպեն դե ֆակտո իշխանությունների հետ։ Բաքվում նրանք հանդիպել են Արցախի ադրբեջանական համայնքի հետ։
Միջնորդները նշում են, որ Բաքվում բանակցությունների ընթացքում իրենք խորը մտահոգություն են հայտնել հրադադարի վերջին խախտումների կապակցությամբ, ինչը շփման գծում հանգեցրել է զոհերի՝ Ադրբեջան իրենց այցելության նախօրեին։
«Նրանք դիմել են Ադրբեջանի ղեկավարությանը՝ կոչ անելով խուսափել հետագա էսկալացիայից։ Համանախագահները նույն ուղերձն են հասցեագրել նաեւ Հայաստանի ղեկավարությանը ու Լեռնային Ղարաբաղի դե ֆակտո իշխանություններին։ Նրանք կողմերին կոչ են արել դիտարկել այն միջոցառումները, որոնք կհանգեցնեն լարվածության նվազմանը շփման գծում ու Հայաստանի ու Ադրբեջանի միջեւ միջազգային սահմանին»,- ասվում է հայտարարության մեջ։
Երկու մայրաքաղաքներում էլ համանախագահները կողմերին կոչ են արել նորից միանալ բանակցություններին։
Հայտարարության մեջ նշվում է, որ հուլիսի 3-ին միջնորդները կմեկնեն Վիենա, որտեղ ՄԽ-ին կտեղեկացնեն իրենց այցելության մասին։ Նրանք նաեւ ծրագրում են հանդիպել Ադրբեջանի ու Հայաստանի ԱԳ նախարարների հետ, որպեսզի քննարկեն գալիք աշխատանքների պայմանները։
