ԵՐԵՎԱՆ, 19 հունիսի — Sputnik. Հայաստանի ու Ադրբեջանի նախագահները կողմ են ղարաբաղա-ադրբեջանական հակամարտության խաղաղ կարգավորմանն ուղղված բանակցությունների շարունակմանը։ ՌԻԱ Նովոստիի փոխանցմամբ`այսօր այս մասին լրագրողներին ասել է ԵԱՀԿ Մինսկի խմբի համանախագահ Իգոր Պոպովը։
«Հուսով ենք, որ կողմերը կշարունակեն քաղաքական երկխոսությունը։ Երկխոսության վերականգման մասին մենք խոսել ենք և՛ Բաքվում, և՛ Երևանում։ Մենք եզրակացրել ենք, որ երկու կողմի նախագահներն էլ շահագրգռված են խաղաղ բանակցությունները շարունակելու հարցում»,- ասել է Պոպովը։
Միևնույն ժամանակ նա մտահոգված խոսել է հակամարտության գոտում առկա լարվածության աճի մասին։
«Մինսկի խմբի միջնորդները խոր մտահոգություն են հայտնում լարվածության վերջին դրսևորումների առնչությամբ»,- ասել է միջնորդը։
Նրա խոսքով` հնարավոր ամեն բան պետք է անել միջադեպերից խուսափելու համար։ Անցած շաբաթ համանախագահներն այցելել էին Հայաստան և Լեռնային Ղարաբաղ, որից հետո առաջնագծում իրավիճակը սրվեց։
Նշենք, որ հունիսի 16-ին, ժամը 18:05-ի սահմաններում, հակառակորդը հաստոցավոր հակատանկային նռնականետերից խախտել է հրադադարի պահպանման ռեժիմը ՊԲ կենտրոնական ենթակայության զորամասերից մեկի պահպանության տեղամասի ուղղությամբ, ինչի հետևանքով մահացու վիրավորում են ստացել ՊԲ զինծառայողներ Արայիկ Ռուդիկի Մատինյանը (ծնված 1997թ.), Վիգեն Ժիրայրի Պետրոսյանը (ծնված 1997թ.) և Վարդան Ծովակի Սարգսյանը (ծնված 1997թ.): Հունիսի 17-ին, 09։40-ի սահմաններում մահացու հրազենային վիրավորում է ստացել նաև ՊԲ զինծառայող, 1997թ. ծնված Նարեկ Տիգրանի Գասպարյանը։
