ԵՐԵՎԱՆ, 18 հունիսի-Sputnik, Գոհար Սարգսյան. 50-ից ավելի միջոցառում՝ մեկ տարում: Կարեն Դեմիրճյանի անվան մարզահամերգային համալիրի տնօրեն Վազգեն Ասատրյանը վստահեցնում է՝ Համալիրն իր պատմության մեջ տարեկան կտրվածքով այսքան միջոցառում իր տանիքի ներքո չի տեսել: Շենքը շնչում է, ապրում, գոհունակությամբ բարձրաձայնում է մեր զրուցակիցը:
Այս պահին Համալիրի շենքը պատկանում է պետգույքի կառավարման վարչությանը: Վազգեն Ասատրյանն ասում է, որ եթե բիզնես մտածողությունը չլիներ, միայն պետությունը չէր կարողանա ֆինանսավորել հսկայական կառույցի ծախսերը:
«Այս ամբողջ 60 հազար քմ-ի մեջ աշխատում է 45 մարդ, միայն այդքանի աշխատավարձն է տալիս պետությունը, այն դեպքում, երբ Օպերայի բյուջեն 1 միլիարդից ավելի հատկացում ունի, 600 հոգուց ավելի աշխատող, ու շահ չի բերում: Իսկ մենք մեր աշխատած շահով այս նորոգություններն ենք անում, երաժշտական պուլտ ենք գնել՝ 50 հազար դոլար արժողությամբ, որը երկրում չկար, բարեբախտաբար, արդեն ունենք: Այս տարի պլանավորել ենք Steinway ռոյալ գնել. Կոնստանտին Օրբելյանը խոսք էտվել օգնել»,-պատմեց Ասատրյանը:
Մարզահամերգայինի տնօրենը նախապաշարմունքներ չունի և առանց կաշկանդվելու ասում է՝ իրենց ծավալած բիզնեսն այնքան արդյունավետ է, որ տարին ավարտվելուն պես կդառնան երկրի խոշոր հարկատուներից մեկը:
«Մարզահամերգային համալիրն իր հաշվի վրա գումար ունի, չի նեղվում, չի լացում, մուրացիկություն չի անում: Ես շատ գոհ եմ իմ աշխատանքից, սիրում եմ այն, ապրում եմ իմ աշխատանքով: Մենք այստեղ օրերով ենք մնում, առավոտյան գալիս ենք ու գիշերը գնում տուն, օրեր են եղել, որ տուն էլ չեմ գնացել»,-ոգևորությամբ պատմեց Վազգեն Ասատրյանը:
Խնայողական աշխատանքի հաշվին Համալիրը ծաղկեցնելու համար Ասատրյանն առաջարկել է նաև արևային էներգիայի կայաններ տեղադրել, ինչի արդյունքում, ըստ նախնական հաշվարկների, ամսական կտնտեսվի 2.5-3 միլիոն դրամ:
«Հիմա ներսը և դուրսը լեդավորել ենք, մոտ 70 տոկոսը փոխել ենք, որ էկոնոմիա անենք: Դրսում, երբ նայում եք, ամբողջ տարածքը զբոսայգի է դարձել, մարդիկ ընտանիքներով գալիս են, հեծանիվ վարում, շաբաթ-կիրակի օրերին ֆիթնես պարապմունքներ են լինում»,-ներկայացրեց մեր զրուցակիցը:
Ի դեպ, պետությունից Մարզահամերգայինին տարեկան տրամադրվում է 163 միլիոն դրամ, որը, տնօրենի խոսքով, հազիվ բավականացնում է աշխատողներին վարձատրելուն և հոսանքի ծախսերին, իհարկե, մասամբ: Որովհետև, եթե տվյալ ամսվա ընթացքում միջոցառում էլ չլինի, ամսական ամենաքիչը 2 միլիոն դրամի էլեկտրաէներգիա սպառվում է:
Այս պահին Վազգեն Ասատրյանն ասվածին մի ամփոփում ունի՝ համաշխարհային մեծության աստղերը գալիս են Համալիր ու մեծ բավականություն ստանում:
Հիշեցնենք, որ 2005 թվականին կառավարությունը Համալիրը վաճառել էր «ԲԱՄՕ» ընկերությանը: 2015 թվականին հայտնի դարձավ, որ բաժնետոմսերի 75 տոկոսը պատկանում է ՀՀ պաշտպանության նախարարությանը: Տեղեկություն կար, որ վերոնշյալ ընկերության սեփականատերերը կառավարությունից 20 միլիոն դրամի վարկ են վերցրել ու դրա դիմաց գրավադրել բաժնետոմսերի 75 տոկոսը: Արդեն 2016 թվականին ՀՀ պետգույքի կառավարման վարչությունը գնել է Կարեն Դեմիրճյանի անվան մարզահամերգային համալիրը: Պաշտոնական փաստաթղթերի համաձայն՝ գործարքը կազմել է 1 մլրդ 24 մլն 943 հազար 800 դրամ:
