ԵՐԵՎԱՆ, 18 հունիսի — Sputnik. Վերջին երկու օրերին հանրապետության տարածքում ցուրտ հոսանքների ներխուժման հետ պայմանավորված դիտվեց օդի ջերմաստիճանի զգալի նվազում: Հունիսի 18-ից սկսած մինչև հունիսի 20-ը Հայաստան կներթափանցեն տաք օդային հոսանքներ, ինչի արդյունքում օդի ջերմաստիճանը կբարձրանա մոտ 5-6 աստիճանով: Այս մասին տեղեկացնում է ՀՀ ԱԻՆ հիդրոմետ ծառայության օդերևութաբանության կենտրոնի պետ Գագիկ Սուրենյանը:
Հունիսի 19-20-ին հանրապետության ցածրադիր հատվածներում՝ հատկապես Տավուշի և Սյունիքի հովտային գոտիներում, Արարատյան դաշտում և Երևանում ցերեկային ժամերին ջերմաստիճանը կհասնի +33…+35 աստիճանի, որից հետո հիմնականում կմնա անփոփոխ:
Չնայած եղանակի տաքացմանը, հունիսի 18-22-ին՝ հատկապես հանրապետության հյուսիսային շրջաններում, մասնավորապես, Շիրակում, Լոռիում, Տավուշում, Արագածոտնի և Կոտայքի լեռնային գոտիներում և Գեղարքունիքում երեկոյան ժամերին կզարգանա ամպրոպային ամպամածություն, սպասվում են կարճատև անձրևներ, առանձին հատվածներում նաև կարկուտ, ամպրոպների ժամանակ քամու ուժգնացում 2025մ/վրկ:
Հայաստանի մյուս շրջաններում երեկոյան ժամերին կլինեն ամպրոպներ, իսկ անձրևները կկրեն զուտ երակային բնույթ, այսինքն բնակավայրերի մի մասում կլինեն անձրևներ իսկ մյուսում՝ ոչ: Երևանում նույնպես ամեն օր երեկոյան ժամերին քաղաքի առանձին հատվածներում սպասվում է կարճատև անձրև և ամպրոպ:
