«Երկիր ծիրանին» պատրաստվում է դիմել ՀՀ վարչական դատարան` բողոքարկելով ավագանու նիստում կայացված մի շարք որոշումներն ու ընթացակարգային վիճելի հարցերը։
Ավագանու նիստերի անցկացման կանոնակարգն, ըստ Զարուհի Փոստանջյանի, կամայական մեկնաբանության է ենթարկվում։
«Կանոնակարգի դրույթները նիստի ընթացքում մեկ այս, մեկ այն ձևով են մեկնաբանվում, նիստը կանոնակարգված չէր և տեղի էր ունենում ոչ ժողովրդավարական սկզբունքներով»,- ասաց «Երկիր ծիրանիի» ղեկավարը։
Խմբակցությունը մտադիր է վարչական դատարանում բողոքարկել նաև ավագանու` այսօրվա ընդունված որոշումները` Երևանի քաղաքապետարանի և վարչական շրջանների ղեկավարների աշխատակազմերի հաստիքացուցակների և Երևան քաղաքի սեփականություն համարվող գույքի օտարման 2017 թվականի ծրագիրը հաստատելու մասին որոշումները։
«Մենք համարում ենք, որ դրանք անօրինական են և ոչ իրավաչափ»,- ասաց Փոստանջյանը։
Անդրադառնալով քաղաքապետարանի և վարչական շրջանների աշխատակազմերի աշխատավարձերին, «Երկիր ծիրանիի» ղեկավարը նշեց, որ ամսական շուրջ 1 մլն դոլար գումար է «խլվում երևանցիներից»։
Ի դեպ, այդ ցուցակում ներառված չեն քաղաքապետարանի ենթակայության տակ գործող ՓԲԸ-ներն ու այլ ստորաբաժանումները։
