ԵՐԵՎԱՆ, 16 հունիսի — Sputnik. «Norway Chess» շախմատային գերմրցաշարի վերջին տուրում հայ գրոսմայստեր Լևոն Արոնյանը սևերով ոչ-ոքի խաղաց ԱՄՆ-ն ներկայացնող Ուեսլի Սոյի հետ և նվաճեց մրցաշարի հաղթողի տիտղոսը:
Պարտիան ավարտվեց 59-րդ քայլում: Արոնյանը 6 միավորով գլխավորեց մրցաշարային աղյուսակը: Մրցաշարի հաղթողի հավակնորդ Հիկարու Նակամուրան վերջին տուրում պարտվեց ամերիկացի Ֆաբիանո Կարուանային և բավարարվեց երկրորդ տեղով:
Այս տիտղոսն Արոնյանի համար երկրորդն էր ընթացիկ տարում: Ապրիլին Արոնյանը հաղթել էր նաև «Grenke Chess Classic» մրցաշարում:
Նախորդ տարի «Norway Chess» շախմատային գերմրցաշարում հաղթել էր Մագնուս Կարլսենը, իսկ Լևոն Արոնյանը բավարարվել էր երկրորդ տեղով:
