Երևանի սելավատար համակարգի մաքրման աշխատանքներն իրականացվում են պարբերաբար և նույնիսկ նախատեսվածից շատ։ Այսօր լրագրողների հետ զրույցում ասել է Երևանի քաղաքապետարանի կոմունալ տնտեսության վարչության պետ Հրայր Անտոնյանը։
Իսկ հունիսի 12-ին Երևանի փողոցներում անձրևից ու կարկուտից հետո տեղի ունեցած հեղեղումների պատճառը ոչ թե հեղեղատար համակարգի թերի աշխատանքն է եղել, այլ կարկուտի հետևանքով ծառերից պոկված տերևների և ճյուղերի առաջացրած խցանումն ու տեղումների աննախադեպ քանակը։
«Մեկ ամսվա նորմայի 50%-ի չափ անձրև է տեղացել։ Նշանակում է, որ 15 րոպեի ընթացքում 15 օրվա տեղումների չափով անձրև է տեղացել։ Ինչ համակարգ էլ լիներ, չէր կարող այդ ջուրը տանել»,- ասաց Անտոնյանը։
Հեղեղումների հետևանքների վերացման մասին Sputnik Արմենիայի հարցին ի պատասխան, վարչության պետը հայտարարեց, որ նույն երեկոյան սկսված մաքրման աշխատանքները շարունակվել են նաև հաջորդ առավոտյան, և այսօր արդեն համակարգը պատրաստ է դիմակայել նոր տեղումներին։
