ԵՐԵՎԱՆ, 15 հունիսի — Sputnik, Արմենուհի Մխոյան. «Ալիսան գիտի, թե ինչ անել», «Նապաստակի 10 ընկերները», «Կապույտ տրակտոր Գոշան». սրանք այն մուլտֆիլմեր են, որոնք ստեղծել են Գյումրու տեխնոլոգիական կենտրոնում գործող «Սկայլայն» (SKYLINE) ստուդիայի մասնագետները։ Սակայն փոքրիկները հատկապես սիրել են գյումրեցի անիմատորների ստեղծած «Կապույտ տրակտոր Գոշան» ուսուցողական անիմացիոն ֆիլմը։
Ռուսական ընկերության պատվերով 2016 թվականին ստեղծված մուլտֆիլմը կարճ ժամանակում հասցրել է այնքան մեծ հետաքրքրություն առաջացնել, որ արդեն մոտ 21 մլն դիտում ունի համացանցում. մուլտֆիլմի 2 սերիաներից մեկը հրապարակվել էր 2016 թվականի դեկտեմբերի 17-ին և կարճ ժամանակում 6.4 մլն դիտում ապահովել։ Մյուս սերիան, հրապարակվելով մարտի 31-ին, ընդամենը 2 շաբաթվա ընթացքում գրանցել է 1.6 մլն դիտում։
Գյումրիում անիմացիայով զբաղվող թիմը շահել է պատվիրատուների վստահությունը, և նրանց տրամադրվում է միայն սցենարն ու ձայնը. մնացածը գյումրեցի անիմատորներն են անում։
Մուլտֆիլմը վերջնական տեսքի բերելուց առաջ տարբեր փուլեր է անցնում՝ պերսոնաժի հավաքում, տեքստուրա, կառուցվածք, ապա նաև անիմացիա:
Անիմատորները հպարտությամբ ասում են` իրենց ստեղծված հերոսները շատ բարի են փափլիկ ու գունեղ՝ առանց չար դիմագծերի կամ արարքների։ Մուլտֆիլմ ստեղծելու ընթացքում հաշվի են առնում նաև ժամանակակից երեխաների պահանջներն ու նախասիրությունները:
«Կապույտ տրակտոր Գոշան» ամբողջ թիմով է պատրաստվել, ամեն մեկն իր գործն է արել»,- Sputnik Արմենիային ասաց մասնագիտությամբ մանկավարժ Արմինեն՝ սիրով ցույց տալով իր ստեղծած մուլտհերոսի հնարավորություններն ու վստահեցնելով՝ ստեղծում են այնպես, որ ամենախստապահանջ ժյուրիի՝ երեխաների դրական գնահատականին արժանանան:
Թեև ստուդիան ընդամենը մեկ տարի է գործում, սակայն արդեն հասցրել է լուրջ հաջողություններ գրանցել 2D և 3D անիմացիայի ոլորտում։ Սկսնակ ընկերության ծառայություներից արդեն հասցրել են օգտվել շվեյցարական, ֆրանսիական, ամերիկյան ու ռուսական ընկերությունները:
