ԵՐԵՎԱՆ, 15 հունիսի — Sputnik. Այսօր` հունիսի 15-ին, Երևանից Բաթում մեկնեց այս տարվա առաջին ուղևորատար գնացքը: Ամառային սեզոնի ընթացքում աշխատող «Արմենիա» գնացքն այդ երթուղով աշխատելու է ամեն օր` մինչև հոկտեմբերի 1-ը։
«Հարավկովկասյան երկաթուղի» ՓԲԸ-ի Ուղևորափոխադրումների տնօրինության պետ Գագիկ Մովսեսյանը նշեց, որ այս տարի առաջիկա 40 օրվա կտրվածքով արդեն իսկ վաճառվել է 1280 տոմս։
«Գնացքի արագությունը մինչև Գյումրի 100-110 կմ/ժամ է, Գյումրիից հետո ռելիեֆի հետ կապված արագությունն ավելի փոքր է։ Գյումրիից հետո առավելագույնը 60 կմ/ժամ է։ Մեր ռուսաստանցի ուղևորները, զբոսաշրջիկները զարմանում են, որ այդ տեղանքում նույնիսկ 60 կմ/ժամ արագությամբ ենք գնում»,- ասաց Մովսեսյանը։
Գնացքի գրաֆիկում կատարված միակ փոփոխությունն այս տարի վերաբերում է Ուրեկի կայարանում գնացքի կանգնելու ժամանակին։ Նախկին 3 րոպեի փոխարեն ուղևորների խնդրանքով գնացքն այսուհետև կանգնելու է 8 րոպե։
Երևանից 15։30-ին մեկնող գնացքը Բաթում է հասնում հաջորդ առավոտյան, 07։10-ին` Երևանից Բաթումի ուղևորությունը տևում է 15 ժամ 40 րոպե, հակառակ ուղղությամբ՝ 15 ժամ 50 րոպե։
Տոմսերի գները տատանվում են 10 070-26 390 դրամի սահմանում` կախված վագոնի կարգից։
Բաթում ուղևորվող առաջին գնացքը կիսով չափ դատարկ էր։ Ուղևորների մեծ մասը սևծովյան վրացական հանգստավայրեր էր մեկնում ոչ թե հանգստի, այլ աշխատելու նպատակով։
Գնացքի ուղևորների թվում նաև մեծ թվով օտարերկրացիներ կային։ Ուկրաինայից Հայաստան ժամանած զբոսաշրջիկները նշեցին, որ առաջին անգամ են որոշել ծովափնյա հանգստի մեկնել հայաստանյան գնացքով, բայց հուսով են, որ ճամփորդությունը հետաքրքիր ու դիտարժան է լինելու։
«Դանդաղ է, բայց փոխարենը շատ բան կհասցնենք տեսնել։ Պատուհանից այն կողմ գեղեցիկ Արարատի տեսարանն է։ Շատ գոհ ենք»,- ասաց Sputnik Արմենիայի ուկրաինացի զրուցակիցը։
Գնացքի բարձր հարմարավետությամբ կուպեներում ու ննջավագոններում գործում է Wi-Fi կապ։ ՀԿե-ի տնօրինությունը նշում է, որ առաջիկայում այդ ծառայությունը նախատեսվում է ընդլայնել ամբողջ գնացքի տարածքում։
