ԵՐԵՎԱՆ, 13 հունիսի – Sputnik. ԵԱՀԿ Մինսկի խմբի համանախագահների հայտարարություններն արդեն բավարար չեն տարածաշրջանում ապակայունացումը կանխելու համար, ասաց ՀՀ արտգործնախարար Էդվարդ Նալբանդյանը էստոնացի գործընկեր Սվեն Միկսերի հետ Երևանում կայացած համատեղ ասուլիսի ժամանակ։
«Համանախագահները բազմաթիվ անգամ հայտարարել են, որ միջազգային հանրությունը կդատապարտի արցախյան հակամարտության իրադրությունը սրող կողմին», – ասաց Նալբանդյանը։
Նա նշեց, որ հայտարարություններն անում են ԵԱՀԿ Մինսկի խմբի համանախագահ երկրների նախագահները, որոնք նաև ՄԱԿ–ի Անվտանգության Խորհրդի մշտական անդամներ են` Ռուսաստանը, Ֆրանսիան, ԱՄՆ–ն։
Նրա կարծիքով` եթե այդ երկրների նախագահները հայտարարում են «խիստ դատապարտման մասին», ապա դրանք զուտ խոսքեր չեն։
«Չնայած դրան՝ Ադրբեջանը ձևացնում է, թե կոչերն իրեն չեն վերաբերում, որ ինքը կարող է արհամարհել կոչերը, հրաժարվում է մեխանիզմներ ներդնելուց, չնայած բոլորին հասկանալի է՝ ով է խախտող կողմը։ Միջնորդները փորձում են հավասարակշռված արձագանքել, չմատնանշել։ Բայց նրանք ևս ստիպված են հասցեական հայտարարություններ անել, ինչը տեղի ունեցավ։ Քանի՞ հայտարարություն պետք է լինի, որպեսզի պարզ դառնա, որ դրանք բավարար չեն և ավելի ազդեցիկ միջոցներ են անհրաժեշտ՝ դրությունն ապակայունացնելու Ադրբեջանի փորձերը զսպելու համար։ Կարծում եմ՝ միջազգային հանրությունը հանգում է եզրակացության, որ մշտապես ուժային մեթոդներով սպառնացող կողմի նկատմամբ համապատասխան քայլեր պետք է ձեռնարկվեն»,- նշեց նախարարը։
ԵԱՀԿ ՄԽ վերջին հայտարարության մեջ ասվում է, որ վստահելի աղբյուրներից հավաքած տեղեկության համաձայն՝ Ադրբեջանը մայիսի 15-ին շփման գծում հրթիռ է արձակել՝ ոչնչացնելով ռազմական տեխնիկա։ Մայիսի 16-ի երեկոյան և մյուս օրը հայկական զինված ուժերը պատասխանել են տարբեր տրամաչափի ականանետային կրակահերթերով։
