ԵՐԵՎԱՆ, 13 հունիսի — Sputnik. Արմավիրի մարզի Մրգաշատ գյուղն այս տարի բերք չի ստանա։ Երեկ երեկոյան կարկտահարության հետևանքով ոչնչացել է գյուղի ամբողջ բերքը։ Այս մասին Sputnik Արմենիային հայտնեց Արմավիրի մարզի Մրգաշատ գյուղի ղեկավար Ռաֆիկ Խաչատրյանը։
«Մենք ինչ ունեինք` դեղձ, լոլիկ, սոխ, կարտոֆիլ, ամբողջը սրբեց-տարավ»,- ասաց գյուղապետը` նշելով, որ գյուղացին այս տարի առատ բերք էր ակնկալում, քանի որ եղանակը բարենպաստ էր, բերքն էլ` առատ։
Գյուղապետի խոսքով` առավոտյան ժամը 8-ին մարզպետ Աշոտ Ղահրամանյանը գյուղատնտեսության փոխնախարարի հետ գյուղում էին։ Հարցին, թե ինչ ասացին, Ռաֆիկ Խաչատրյանը պատասխանեց. «Ի՞նչ ասեին, երեխայի պես լացում էին, ինչպես մենք, այնպես էլ իրենք, բոլորի տանը սուգ է։ Բոլորը վարկերի տակ են, ինչ պիտի անեն, չգիտեն»։
«Այնպիսի բերք կար, որ մի քանի տարի նման բերք չէինք տեսել, բոլորը գոհ էին»,- պատմում է գյուղապետը`հավելելով, որ գյուղացիները պատրաստվում էին առաջիկա օրերին բերքահավաք սկսել, բայց կարկուտը մարդկանցից շուտ հասավ այգի։
