ԵՐԵՎԱՆ, 13 հունիսի – Sputnik. Էստոնիան շահագրգռված է տեսնել ՀՀ-ԵՄ վիզաների ազատականացման գործընթացի արագ ավարտը, երեքշաբթի Երևանում ասաց Էստոնիայի արտաքին գործերի նախարար Սվեն Միկսերը ՀՀ ԱԳՆ ղեկավար Էդվարդ Նալբանդյանի հետ համատեղ ասուլիսի ընթացքում։
Այս տարվա երկրորդ կեսին Էստոնիան ստանձնելու է Եվրամիության խորհրդի նախագահությունը ԵՄ խորհրդի օրենսդիր մարմնում։
«Ինձ թվում է, որ մարդկանց ազատ տեղաշարժը շատ կարևոր ասպեկտ է երկրներն ու ազգերն իրար մոտեցնելու գործում: Շատ կցանկանայի տեսնել Եվրամիության և Հայաստանի միջև մարդկանց տեղաշարժի դյուրացման գործընթացը» – ասաց Միկսերը։
Ինչ վերաբերում է ժամկետներին, նրա խոսքով, դա կախված է մի շարք զուգընթաց գործոններից։
«Էստոնիան շահագրգռված է տեսնել այս գործընթացի արագ ավարտը, բայց ի վիճակի չեմ ժամկետներ նշել ավարտի մասին: Հուսամ, որ մենք թափ կհավաքենք, իսկ մնացածը կախված է այն բանից, թե ինչքան է Հայաստանը համապատասխանում ներկայացված չափանիշներին », – նշեց Միկսերը։
Էստոնիայի արտգործնախարարը Հայաստան է ժամանել պաշտոնական այցով, որի շրջանակում նա նաև կհանդիպի ՀՀ նախագահ Սերժ Սարգսյանի, Ազգային ժողովի նախագահ Արա Բաբլոյանի և վարչապետ Կարեն Կարապետյանի հետ։
