ԵՐԵՎԱՆ, 11 հունիսի — Sputnik. Նորվեգիայի Ստավենգեր քաղաքում սուպերմրցաշարի երեկվա տուրի լավագույն պարտիան դարձավ Լևոն Արոնյանի և Մագնուս Կարլսենի մենամարտը, որի ընթացքում հայ գրոսմայստերը ոչ մի շանս չթողեց աշխարհի չեմպիոնին, գրում է chess-news.ru կայքը:
«Մագնուսի հուսահատությանը սահման չկար` նա կատարեց իր պարտականությունները Նորվեգիայի հեռուստաալիքի եթերում, որտեղ, պայմանագրի համաձայն, պարտավոր է գալ յուրաքանչյուր պարտիայի ավարտից հետո, այնուհետև արագ հեռացավ մխիթարություն փնտրելու»,- գրում է շախմատային կայքը:
Պարբերականի պնդմամբ` մրցաշարային դահլիճը միանգամայն այլ տրամադրությամբ էր լքում «հայ երկրպագուների սիրելին»:
«Պարզապես, երեկ մենք հասկացանք, որ գյուղատնտեսական աշխատանքով զբաղվելն ավելի ծանր է, քան շախմատ խաղալը, այդ պատճառով էլ կենտրոնացանք մեր հիմնական մասնագիտության վրա»,- այսպես իր հաղթանակը մեկնաբանեց Արոնյանը:
Նորվեգիայում շախմատային սուպերմրցաշարի մասնակիցները մրցաշարից մեկ օր առաջ այցելեցին ֆերմա, որտեղ առաջատար գրոսմայստերներին ծանր աշխատանք էր բաժին ընկել` նրանք պետք է կով կթեին: Ստավենգեր քաղաքի Norway Chess սուպերմրցաշարի չորրորդ տուրում Արոնյանը սպիտակներով հաղթանակ տարավ նորվեգացի աշխարհի չեմպիոն Մագնուս Կարլսենի նկատմամբ:
Aronian: "The difference between my wins against Carlsen and his wins against me: I had to work hard for mine." #NorwayChess pic.twitter.com/SCXLLu2lwt
— Olimpiu G. Urcan (@OlimpiuUrcan) 11 июня 2017 г.
