ԵՐԵՎԱՆ, 11 հունիսի — Sputnik, Խաչիկ Չախոյան. Առաջին խաղաակեսում Չեռնոգորիայի հավաքականը Ֆատոս Բեչիրայի և Ստեվան Յովետիչի ջանքերով հաշվի մեջ առաջ անցավ երկու գնդակի տարբերությամբ: Երկրորդ կեսում դաշտի տերերի առաջատար Յովետիչը դարձավ դուբլի հեղինակ, իսկ խաղում հետ տրիկի հեղինակ:
Հայաստանի հավաքականի համար խաղը շատ վատ մեկնարկ ունեցավ: Կարելի է ասել, որ մենք խաղադաշտ դուրս եկանք պարտվելիս: Երկրորդ րոպեին մեր թիմը ստիպված էր խաղը վերսկսել կենտրոնից: Մերոնք շատ արագ սխալ թույլ տվեցին: Ու ընդ որում պաշտպանության փոխապահովագրումը չաշխատելու պատճառով էր, որ գնդակը հայտնվեց մեր թիմի դարպասում: Անմիջապես մեր թիմը հայտնվեց հետապանդողի դերում: Սա երևի ամենավատ սցենարն էր մեր հավաքականի համար:
Ճիշտ է՝ բաց թողած գոլից հետո մեր հավաքականը գնաց առաջ ու ունեցավ պահեր, որոնք կարող էին ավելի լավ ավարտ ունենալ մեր թիմի համար: Մարկոս Պիզզելլին կարող էր խփել պատասխան գնդակը, բայց լավ խաղաց դաշտի տերերի դարպասապահ Դանիել Պետկովիչը: Եղան պահեր, երբ մերոնք գրոհի ճիշտ շարունակության դեպքում կարող էին հասնել ավելիին, բայց, ավաղ, խաղի 28-րդ րոպեին Չեռնոգորիան երկրորդ անգամ հասավ հաջողության:
Ու նորից մեր ֆուտբոլիստները բավականին հեշտությամբ մրցակցին հնարավորություն տվեցին մոտ տարածությունից հարվածել: Ստեվան Յովետիչը վարպետորեն անցավ Հրայր Մկոյանից ու դիպուկ հարվածով կրկնապատկեց դաշտի տերերի առավելությունը: Ավելին՝ մեր բախտը բերեց առաջին կեսի վերջին րոպեյին Բեչիրայի հարվածից հետո: Մոսկվայի «Դինամոյի» հարձակվողի անցումից ու հարվածից հետո գնդակը հետ մղվեց դարպասաձողից: Ինչպես և Երևանում, Չեռնոգորիայի հավաքականը առաջին խաղակեսում հաղթեց 2:0: Արդյո՞ք մերոնք ունակ էին կրկնել երևանյան սխրանքը:
Պարզ էր, որ անհավանական էր սպասել խաղի նման շրջադարձի, ինչպես եղավ Երևանում, ու Յովետիչը ամեն ինչ իր տեղը դրեց խաղի 54-րդ րոպեին: «Սևիլյայի» հարձակվողը հերթական անգամ ցուցադրեց գնդակով տեղաշարժվելու իր վարպետությունն ու պարզապես կատարեց հարվածը, որից հետո մեր թիմը երրորդ անգամ խաղը վերսկսեց կենտրոնից: Խաղի ելքը վճռված էր: Մեր թիմի պահեստայինների «կարճ» նստարանը զգացնել տվեց: Վնասվածք ստացած կամ որակազրկված ֆուտբոլիստները համարժեք փոխարինողներ չունեցան:
Այս խաղում մենք գոլ խփել կարող էինք և՛ առաջին կեսում, և՛ ընդմիջումից հետո: Բայց բազմաթիվ սխալները պաշտպանությունում ու կիսպաշտպանության կենտրոնում հանգեցրին մեր թիմի պարտությանը: Երկու թիմերի կազմերում էլ խաղադաշտում էին ընդգծված առաջատարները՝ Մխիթարյանն ու Յովետիչը: Մեր առաջատարը այս խաղում ոչնչով աչքի չընկավ: Իսկ ահա Յովետիչը իր թիմի համար շատ գեղեցիկ վերջաբան էլ ապահովեց՝ խաղի ավարտից ութ րոպե առաջ դառնալով գերազանց գոլի հեղինակ ու միաժամանակ իր հետ-տրիկով ապահովեց իր թիմի հաղթանակը:
Ճիշտ է՝ Ռուսլան Կորյանը կարողացավ կրճատել հաշվի տարբերությունը խաղավերջում, բայց խոշոր հաշվով պարտությունից խուսափել չհաջողվեց:
