ԵՐԵՎԱՆ, 11 հունիսի — Sputnik. Ամերիկահայ լեռնագնաց, արշավորդուհի Թելմա Ալթունը, Վարդենիս քաղաքից շուրջ 280 կիլոմետր վազելով, հասել է Արցախ։ Այս մասին հայտնում է «Արցախպրեսը»:
Արշավորդուհին ասել է, որ շատ արշավների է մասնակցել, բայց սա իր առաջին այցն է հայրենիք:
«Վազքս սկսել եմ Վարդենիս քաղաքից, որտեղից արշավային երթուղով հասել եմ Ստեփանակերտ։ Արշավի ընթացքում մի քանի վայրում կանգ եմ առել, զրուցել տեղացիների հետ: Բավականին տպավորված եմ իմ հայրենակիցների ջերմ և անմիջական վերաբերմունքից: Ուրախ եմ և հպարտ, որ այս հողում ապրում են հայրենասեր մարդիկ, հիացած եմ տեսարժան վայրերով և հրաշք բնությամբ: Խոստանում եմ, որ նորից կվերադառնամ իմ հայրենիք»,- ասել է Թելմա Ալթունը:
Նա նշել է, որ իր նախաձեռնության հիմնական առաքելությունը դրամահավաքի կազմակերպումն է «Համահայկական Արշավային Երթուղի» նախագծի համար, որի գլխավոր նպատակն է Հայաստանում զարգացնել արկածային, արշավային տուրիզմի ենթակառուցվածքները, գծանշել, քարտեզագրել Հայաստանի բոլոր արշավային երթուղիները:
«Հայ լեռնագնացների ընկերակցություն» հասարակական կազմակերպության Լոս Անջելեսի մասնաճյուղի համահիմնադիր Ռոբերտ Ասսարյանը, որը հովանավորել է արշավորդուհու ծրագիրը և անձամբ մասնակցել վազքին, ասել է, որ իրենց կազմակերպությունը երեք ծրագիր ունի:
«Առաջին ծրագիրը Հայաստանի ամենահետաքրքրական և կարևոր արահետներում ցուցանակներ տեղադրելն է, որն արդեն ավարտել ենք: Մյուսը՝ Վրաստանից-Իրան ճանապարհներին ցուցանականեր տեղադրելը, որպեսզի լեռնային զբոսաշրջիկները, անցնելով այդ տարածքի գյուղերով, իրենց դրամական ներդրումը բերեն, և կարողանանք ավելի գեղեցկացնել այդ վայրերը: Հաջորդ ծրագիրն այն է, որ Վարդենիս-Հադրութ ճանապարհը բարելավենք լեռնագնացների համար, ցուցանակներ տեղադրենք, որպեսզի զբոսաշրջիկների համար ավելի հետաքրքրական լինի»,-ասել է Ասսարյանը:
Ստեփանակերտի «Մենք ենք մեր սարերը» հուշարձանից արշավորդուհու վազքին միացել են նաև արցախցի մարզիկներ, որոնք նրան ուղեկցել են մինչև մայրաքաղաքի Վերածննդի հրապարակ:
