ԵՐԵՎԱՆ, 10 հունիսի — Sputnik. Գոհար Սարգսյան. Ընդհանուր աղմուկ, հուզմունքով և ուրախությամբ միախառնված լացի ձայներ ու ծափեր։ Հեռվից հասկանալի դարձավ, որ Սուդանից ժամանած հայ բժիշկների ու նրանց հարազատների հանդիպումն իրողություն է։ Երեքն էլ, լինելով ռազմական բժիշկներ, գիտեն ու տեսել են, թե ինչ է դաժան տեսարանը։ Նուբա լեռներում դաժանությունը չէր, որ պետք է զարմացներ նրանց։ Հայ բժիշկներն այնտեղ իրապես հասկացել էին, թե ինչ է մարդասիրությունը։
«Կարողացանք ապացուցել, որ գնացել ենք այնտեղ մարդկանց օգնելու։ Թոմ Քաթինային փոխարինել հնարավոր չէ։ Մենք սրբերի հետ ապրում ենք, բայց նրանց չենք գնահատում։ Երբեմն մենք թեթև բաներ ենք անում, մեզ թվում է, թե նվիրվում ենք, բարեգործություն ենք անում։ Այդ միջավայրը տեսնելն է մեզ մաքրում, նորոգում»,- ասաց Նուբա լեռներում գտնվող «Գթության մայր» հիվանդանոց մեկնած բժիշկներից Գևորգ Ոսկանյանը։
Սուդանի կառավարական ուժերն այս տարիներին տասնմեկ անգամ արդեն ռմբակոծել են «Գթության մայր» հիվանդանոցի տարածքը։ Բժիշկ Թոմ Քաթինան, որին փոխարինելու էին գնացել հայ բժիշկները, հենց այդ հիվանդանոցում է աշխատում: Նա միակ վիրաբույժն է 750 հազար բնակիչ ունեցող մի տարածաշրջանում, որն իր չափերով հավասար է Ավստրիային։
Բժիշկ Հայկ Հովհաննիսյանը պատմեց, որ մոտ մեկ շաբաթ է տևել Սուդանի նշյալ վայր մեկնելը, նույնքան էլ` վերադառանալը։ Մնացած ժամանակ նրանք օրուգիշեր հիվանդների կողքին են եղել։
«Մոտավորապես 200 հիվանդ էր այդ պահին այնտեղ։ Բայց ամենահետաքրքիրը ծնունդներն էին»,-ասաց Հովհաննիսյանն ու խոսքը փոխանցեց Արմինե Բարխուդարյանին, որը ծնունդներ էր ընդունել հիվանդանոցում։
Արմինեն շատ չխոսեց, միայն ասաց` շատ-շատ երեխաներ են ծնվել, կպատմեմ հետո։
Sputnik Արմենիայի հետ զրուցեց նաև Նուբա մեկնած ռեժիսոր-օպերատոր Խանե Պողոսյանը։
«Դաժանություն կա, բայց այն լույսը, որ ես տեսա, դաժանությունը հեռու մղեց։ Վերջին ամիսների ընթացքում այնտեղ բուռն ռազմական գործողություններ տեղի չեն ունեցել։ Հրազենային վիրավորմամբ երկու հիվանդ ունեցանք։ Մարդկանց մոտ վախն ու տագնապ կար, որ ամեն վայրկյան կարող է պատերազմը վերսկսվել։ Դրա համար էլ նրանց կենցաղում, հոգեբանության մեջ ամեն վայրկյան նկատելի էր այդ մտավախությունը»,- ասաց նա։
Կավաջա կամ սպիտակ մարդ։ Այս բացականչությունները Սուդանից Հայաստան վերադարձած բժիշկների ականջներում դեռ երկար կհնչեն։
