ԵՐԵՎԱՆ, 9 հունիսի — Sputnik, Լաուրա Սարգսյան. ՀՀ սփյուռքի նախարարությունում տեղի ունեցավ հանիպում ռուսատանաբնակ հայ բարերար Հրաչյա Պողոսյանի հետ։ Նա Հայաստան է բերել ցուցահանդես, որի մեջ ընդգրկել է իր բարեգործական գործունեությունը ներկայացնող շուրջ 80 լուսանկար։
«Մենք ցանկանում ենք մեր երախտագիտությունը հայտնել բարերար, բազմաթիվ նախագծերի նախաձեռնող Հրաչյա Պողոսյանին, ով ջանք չի խնայում նաև հայ-ռուսական հարաբերությունների զարգացման համար», – լրագրողների հետ զրույցում ասաց սփյուռքի նախարար Հրանուշ Հակոբյանը։
«Սիրով Հայաստանին և Ռուսաստանին» ցուցահանդեսը բացվելու է հունիսի 10-ին, նույն օրը Տիխվին քաղաքում կկայանա 1941 թվականի հոկտեմբերի 14-ին տեղի ունեցած ողբերգությանը (այդ օրը գերմանացիները պայթեցրին շրջափակման մեջ գտնվող երեխաներով վերջին երկու էշելոնները։ Պատմաբանների տվյալներով զոհվել է շուրջ 2000 երեխա) նվիրված «Հավերժության գնացք» ֆիլմի ցուցադրությունը։ Նույն օրը հայ հասարակությանն իր գիրքը կներկայացնի լեգենդար մարշալ Բաղրամյանի թոռը` Հովհաննես Բաղրամյանը։
Միջոցառման շրջանակներում գյումրեցի Յուզեխովիչ ընտանիքին կհանձնվի Պողոսյանի աջակցմամբ ձեռք բերված բնակարանի բանալիները։
«Վաղը մենք նոր բնակարանի բանալիները կփոխանցենք Յուզիխովիչների ընտանիքին, որը տանիքից զրկվել է 1988 թվականի երկրաշարժի պատճառով, իսկ անցյալ տարվա ապրիլյան պատերազմի ընթացքում նաև կորցել է որդուն», – ասաց Հակոբյանը։
Ծնողներին տուն նվիրելը Յուզիխովիչների որդու երազանքն էր, սակայն նա չհասցրեց…
Ինքը` Պողոսյանը, վստահ է, որ իր գործունեությունը թույլ կտա վերականգնելու այն ջերմությունը, որը ժամանակին կապում էր նախկին ԽՍՀՄ ժողովուրդներին։
Պողոսյանը ծնվել է Ագարակ գյուղում, այնտեղ էլ անցել է նրա մանկությունը։ 1988 թվականին նա ավարտել է ռազմական թեքումով Մարշալ Բաբաջանյանի անվան Երևանի մասնագիտական հանրապետական դպրոցը։ Արժանացել է կապիտանի կոչման, սակայն 1999 թվականին լքել է ԶՈՒ–ն` պահուստային մայորի կոչումով։ Այսօր նա զբաղվում է բարեգործությամբ։
«Ամեն անգամ Հայաստան գալով` լցվում եմ հայրենիքիս ջերմությամբ», – Sputnik Արմենիայի թղթակցի հետ զրույցում ասաց Պողոսյանը։
Բնակվելով Սանկտ Պետերբուրգում` Պողոսյանը լավ գիտի` ինչ է նշանակում կարոտել հայրենիքը, այն վայրերը, որտեղ ծնվել և մեծացել ես։ Այս հարցում օգնում են պարբերաբար Հայաստան այցելելը։
Պողոսյանը գործունեություն է ծավալում 10 երկրներում` Ռուսաստան, Հայաստան, Վրաստան, Էստոնիա, Սլովակիա, Լիտվա, Լատվիա, Ղազախստան, Բելառուս և Մոնղոլիա։ Նրա աջակցությամբ վերականգնվել և վերանորոգվել է մշակութային և պատմական նշանակության ավելի քան 80 օբյեկտ, դրանցից 24 հուշարձան` նվիրված Հայրենական մեծ պատերազմի հերոսներին կամ իրադարձություններին, 6 խաչքար` Հայոց ցեղասպանությանը։
